Serchhip Dist. in Final khel dawn

Cricket Association of Mizoram (CAM) buatsaih ‘Inter District Cricket Tournament, 2025’ khelh mekah Vawiin hian Serchhip District in Final an khel dawn a, Lunglei District an hmachhawn ang.

Siaha in an thlen ‘4th Inter District Cricket Tournament’ khelh mekah hian nimin khan Semi Final khelh niin inkhel hmasa zawkah Serchhip District hian a thlengtu Siaha District chu run 88-a hnehin Final an lut a, he inkhel ah hian Toss-a chak Serchhip District in vuak hmasa thlangin Overs 20-ah run 172 siamin Wicket 4 an hloh a. Serchhip District tan Kisan Singh chuan run 96 siamin Dr. Lalrintluanga Sailo chuan run 32 a siam bakah Vanlalhruaia chuan run 23 a siam bakah midang in an belh bawk a, run 172 hi sang tho mah se a hma ni-a Lunglei laka run 199 an hum zawh loh avangin an dinhmun hi a tha lutuk lo a ni.

Hemi hnu hian Serchhip District lam hian vawm ve lehin ball hmasa berah Wicket an la nghal a, hemi hnu hian a khat tawka Wicket la zeuh zeuhin Overs 16-ah an vawm out vek a, Siaha lam hian run 84 chauh an tlin avangin Serchhip District hi run 88 in an chak a, Final an lut ta a ni. Serchhip lam atang hian Terina, Samuel Vanlalawmpuia, Kisan Singh leh Ryan Rem te chuan Wicket 2 theuh lain Hmingthanpuia leh C. Zoramthara te chuan Wicket pakhat ve ve an la bawk. He inkhel ah hian Serchhip District plater Kisan Singh chu Player of the Match atan thlan niin Best Batter atan thlan a ni bawk a, Best Bowler atan Ryan Rem chu thlan a ni bawk.

Serchhip District hian Vawiin hian Final khelin niminpiah lama an hneh loh Lunglei District an hmachhawn leh dawn a. Nimin-a Semi Final inkhel hnuhnung zawkah Lunglei District leh Kolasib District inhmachhawnin Toss-a chak Kolasib DCA in vuak hmasak thlangin Over 20-ah run 135 siamin Wicket 6 an hloh a. Target an siam hi Lunglei DCA hian um ve lehin Overs 14.2-ah Wicket 3 hloh in an target hi an umphak a, Wicket 7 in hnehna an chang ta a ni.