Kum 2024-2025 chhungin Mizoram-ah CWC-in case 1,573 leh JJB-in 219 an chingfel

Nikum April atanga kumin March inkar chhung khan Mizoram-a Child Welfare Committee (CWC) chuan Case 1,573 leh Juvenile Juvenile Justice Board (JJB)-in case 219 an chingfel a. April, 2024 atanga March, 2025 inkar chhung khan Child Care Institution (Home) hrang hrangah naupang 695 dah thar an ni.

Mizoram State Child Protection Society thawktute hnen atanga Zalen thudawn danin nikum chhung khan naupang chungchang ngaihtuah tura ruat, CWC hian kum hmasaa case ngaihtuah hman loh (pending) 85 neiin case dawn thar 1,566 an nei bawk a. Heng zinga case 1,573 chu chingfelin case 78 chu kum thar lam ngaihtuah chhunzawm turin an dah a. CWC-in case an dawn thar zingah hian retheihna avanga naupang enkawl thei lo chu tam berin case 415 a tling a, hei hi case an dawn zawng zawng atanga chhutin 26% a tling a. Nu leh pa fel lo/enkawl mumal thei lo (incapacitated parents) chu case tam ber dawttu niin 361 ngaihtuah a ni a, mipat hmeichhiatna rawngkai (sexual abuse) chu pathumna niin case 158 dawn a ni bawk. CWC case dawn thar zinga 863 chu hmeichhia niin mipa 703 an awm bawk a. Case an chinfel zinga tam zual chu mi dang enkawl tura kaltir (sponsorship) 783, Children Home-a dah 349, Councelling kaltir 162, Case tihtawp 122 leh chhungte hnena hawtir 107 te an ni.

Nikum chhung vek khan tleirawl/rawltharte harsatna ngaihtuah tura din, JJB chuan case 219 an chingfel bawk a. JJB hian kum hmasa lama case pending 45 neiin dawn thar 260 an nei bawk a, case 86 chu kumthar lama ngaihtuah tura dah a ni a, case dawn thar zinga 31 hi hmeichhia niin mipa 229 an awm bawk. JJB case dawn thar zingah hian rukruk case tam berin case dawn thar 260 zinga 121 lai a ni a, 46.53% lai a tling a. JJB case dawn thar zingah hian POCSO Act 38, ND&PS Act 32, mi tihnat 17-te chu a tam zual an ni a. Chinfel zinga tam zualte chu Home-a dah 94, nungchang that vanga chhuah 67, Special Home-a thawn 34 te an ni.

Hemi hun chhung khan Mizoram-a Child Care Institution (Home) hrang hrangah naupang 695 dah thar an ni a. Hengte hi Children’s Home-ah 413, Observation Home-ah 211, Special Home-ah 24, hmun him zawka dah 23 leh Adoption Agency (naupang lak) 24 te an ni a. Tun dinhmunah Mizoram chhungah Home 51 a awm mek a ni.