Serchhip District-ah Sawhthing quintal sing riat chuang hralh tur a la awm anga chhut a ni

Serchhip District-ah kuthnathawktute tharchhuah Sawhthing lei tur quintal 87,042 la awm anga chhut a ni a, heng atang hian SCC hrang hrangte tan Sawhthing lei leh turah allocation siamin quintal 28,500 hralh leh tura ruahman a ni a, Sawhthing la hralh lo khua te chu duhsak tura ruahman a ni bawk.

Tunhnaia Serchhip Bawrhsap hova Serchhip District Agriculture Marketing Committee (DAMC) thutkhawm neih ah Secondary Collection Centre (SCC) hrang hrang ten Sawhthing lei tur la awm zat an beisei tarlan niin he huna tarlan a nih danin Serchhip District-a SCC pasarih (7)-ah Sawhthing quintal 87,042 la awm tura beisei a ni a, Chhingchhip SCC hnuaiah Sawhthing hi la tam berin quintal 23,169 la awm tura beisei a ni a, Serchhip/Chhiahtlang SCC hnuaiah quintal 16,589 la awm tura beisei niin Khawlailung SCC hnuaiah quintal 16,695; Thenzawl SCC hnuaiah quintal 12,700; Lungpho SCC hnuaiah quintal 7300; East Lungdar SCC hnuaiah quintal 6759 leh North Vanlaiphai SCC hnuaiah quintal 3830 la awm tura beisei a ni a. Sawrkar ruahmanna anga Sawhthing lei leh turah SCC hrang hranga Supervisor leh SCC hruaitute chuan SCC Kudam-a leng tawk a zirin Sawhthing buk leh tur zat chu PCC tinah allocation lo siam ho leh tura beisei an ni.

Hemi rual hian Serchhip District Agriculture Marketing Committee (DAMC) chuan SCC Kudam hrang hranga leng tawk milin allocation an siam bawk a, Khawlailung SCC tan quintal 8000; Serchhip/Chhiahtlang SCC tan quintal 6500; Chhingchhip SCC tan quintal 5000; North Vanlaiphai SCC tan quintal 3500; Thenzawl SCC tan quintal 3000 leh East Lungdar SCC tan quintal 2500; a vaiin quintal 28,500 a ni a. Allocation siam ang hian SCC hnuaia PCC ten Sawhthing an buk theih zat tur chu SCC hruaitu ten an ruahman sak dawn a, PCC zingah Sawhthing la hralh miah lo khua an awm a nih chuan duhsak hmasak tur niin buyer te nen an inbiak fel hnuah chauh Sawhthing hi chawh tur a ni ang.

Serchhip District Agriculture Marketing Committee (DAMC) chuan Sawhthing hralhna turah hian Reserved Price pawh ruahmanna siamin quintal 1000 hnuailam ah chuan kg. khat zelah Rs. 18/- a ni anga, quintal 1001 atanga quintal 5000-ah kg. khat zelah Rs. 17/- niin quintal 5001 atanga quintal 10,000 chinah kg. khat zelah Rs. 16/- a ni anga, quintal 10,001 atanga a chunglam zawngah chuan kg. khat zelah Rs. 15/- a ni dawn a. SCC atanga Sawhthing hralh reng reng DAMC hriatpui a nih loh chuan Support Price pek an ni dawn lo a. Hemi tur hian Auction Notice siam ngei ngei a ngaih bakah Auction Award pawh SCC in buyer hnenah a pechhuak thin tur a ni bawk.

Hetihlai hian Serchhip/Chhiahtlang SCC (Cluster) hnuaia khaw hrang hrang te pawh Sawh-thing an hralh dan tur ruahmanna siam a ni tawh a, Serchhip PCC in hralh tam berin quintal 3000 hralh thei tura beisei an ni a, Chhiahtlang PCC in quintal 1500 hralhin Hriangtlang PCC in quintal 1000 leh Bungtlang leh Keitum PCC ten quintal 500 ve ve an hralh thei dawn bawk a ni.

Serchhip Cluster huamchhunga khaw hrang hrangte hi nimin, April 23 atanga an Sawhthing te lo cho tura hriattir an ni a, Sawhthing dahna tur bag te hi mahni lo intum tura hriattir niin hei hi buyer ten bag khat Rs. 10/- hisap in an khul ve leh thung dawn a, Buara bag leh Satha ip, buhfai dahna bag ang chi chu hman phal ni lovin bag khat ah hian Sawhthing kg. 40 tal khung tura beisei a ni bawk.

Sawhthing hralh turte hian Chhiah-tlang dai-a SCC-ah dah tur a ni dawn a, a phurh man tur leh phurh dan tur chu Sawhthing thartute leh PCC ten ruahmanna siamin SCC-a dah turte hi an awmna khua/VC Area Society te hriatpuina lehkha keng tel ngei tura hriattir an ni a, lehkha nei lo chu an Sawhthing te SCC-ah dah phal a ni dawn lo a ni.