Dampa Tiger Reserve-a thawk ten lawmthu an sawi

Dampa Tiger Reserve-a thawkte chuan sawrkar laipui atanga an hlawh tur an hmuh har thin avanga harsatna an tawh thinte hrethiama Mizoram sawrkarin thla tin hlawh an lak theihna tur a ruahman chu lawmawm an tih thu an sawi.

    Thuchhuah an siamah Dampa Tiger Reserve-a thawkte chuan, Project Tiger (CSS) hnuaiah mi 160 vel an thawh mek tih sawin, “National Tiger Conservation Authority funding hnuaia hlawh la thin kan ni a, Funding lo kal hun chhung a rei thin avangin hlawh hi a tlangpuiin kum khatah vawi khat kan la thin. Chhungkaw châwm deuh vek kan nih avangin hlawh lak loh kârah kan buai thin hle. Reserve chhunga venhimna hna (Anti-Poaching Camp Duty) thawk tura chhuah pawh harsa tih châng kan ngah thin,” an ti a. An harsatnate hrethiama sawrkarin thla tin hlawh an lak theihna tur a ruahman chu lawmawm an tih thu sawiin, “Kan State sawrkar chak takin thla tin hlawh la thei tura State sum atanga min pek min tiam hi a lawmawm kan ti takzet,” an ti a; ZPM sawrkar chungah thinlung takin an lawm tih an sawi a ni.