SCC hruaitute Sawhthing hralh sawipui an ni

Sawrkar in Sawhthing a lei mekah Serchhip District-a Secondary Collection Centre (SCC) hruaitute chu nimin khan Sawhthing hralh kawnga an dinhmun mek leh hmachhawp bakah harsatna an tawh dan te sawipui an ni.

Mizoram Sawrkar in Sawhthing lei a kalpui chhunzawm leh mekah tun dinhmunah thuang hniha kalpuiin sawrkarin Rs. 50 zela a leisak bakah Auction kalpui reng a ni bawk a. Hemi chungchangah hian nimin khan Serchhip District-a SCC hruaitute chu District Agriculture Marketing Committee (DAMC) chuan DC Meeting Hall-ah an kokhawm a, he hunah hian Bawrhsap Paul L. Khuma chuan Sawhthing chingtute sum lakluh a pun theihna turin Marketing lamah tanpui a tum thu leh chu a hmathlir tihhlawhtlinna tur chuan mawhphurhna neitu zawng zawngin pheikai rual a an tihtur an helnchhuah theuh a tul thu a sawi a. Sawhthing lei leh hralh kalpui danah SCC te dinhmun a inang lo tih sawiin, thenkhat an thiam em em laiin thenkhat la hrethiam tawk lo deuh te an awm avang leh harsatna an tawh dan te a inan loh avanga he sawihona hun hi buatsaih a nih thu a sawi bawk.

He hunah hian Serchhip District chhunga SCC tin atangin Chairman, Secretary leh Manager te telin an hriatthiam loh te inhrilhfiah a nih bakah an harsatna tawh chinfel dan kawng te kawhhmuh an ni a. SCC tin te hi mahni ke a ding tur leh auction te pawh anmahniin tichhuak a, a leitu tur pawh ngaihven tura beisei an nih laiin anmahni viltu Supervisor leh Co-ordinator te pawh englai pawha an rawn reng theih thu inhrilhriat thar leh a ni a. Hralhna kawngah harsatna an tawk a nih chuan DAMC Auction Team ten an tanpui theih thu an hrilh bawk a ni.