TB vei te enkawlna tur damdawi thar BPaLM July thla velah MDR-TB veite pek tan theih beisei

Tuberculosis (TB) vei te enkawlna tur damdawi thar ‘BPaLM’ an tih chu kumin July thla velah MDR-TB veite hnenah pek tan theih beisei a ni.

Zalen in Health Department-a thawktute hnen atanga thu a dawn danin TB dam har chi an tih mai, Multi Drug Resistant-TB (MDR-TB) damdawi thar BPaLM hi sawrkar laipui-ah indent thuai tum a ni tih an sawi a, tun atanga thla 2 hnu velah chuan a lo thlen beisei a ni tih an sawi a ni. TB damdawi thar BPaLM chu tuna TB enkawlna damdawi ai chuan a tha zawk tih sawiin, “Tuna TB damdawi kan pek hi chu a reilo berah damlo ten thla 9-11 inkar an ei ngei ngei a ngai a. BPaLM erawh thla 6 chhung ei a niin a damna rate (success rate) pawh a sang zawk a, chuvangin TB veite pawhin an ei duh zawk dawn a ni,” an ti a. State TB Control thawktute chuan BPaLM chu MDR-TB vei hmuhchhuah tharte chauh pek an ni dawn tih sawiin, “Tuna Multi Drug Resistant TB damdawi ei mek te hi chuan an damdawi ei hi an chhunzawm anga, MDR-TB vei hmuhchhuahte hnenah chuan BPaLM damdawi hi pek a ni dawn a ni,” an ti.

Kumin (2025) thla 3 chhung kalta (January-March) chhung khan Mizoram-ah TB vei hmuhchhuah thar mi thahnem tak an awm tih sawiin, an zinga 60% vel chu Chuap TB a niin a dang 40% hi taksa dang (pumpui, ruh, vun, thalbe leh thildang TB an ni tih an sawi a. Inenkawlna damdawi a that tawh bakah Health Department thawktu ten he natna veite enkawl ngun avangin a dam pawh an tam tih an sawi a. “Kum 2022 khan TB vei dam zat hi 87% a ni a, kum 2023 ah 88% leh nikum-ah TB vei zinga 80% enkawl dam an ni a. A damna rate a san chhan hi TB natna vei enkawl thiam anih tak vang te, thawktu ten an umzui peih vang leh damlo ten damdawi an ei that vang a ni,” an ti a. Hetihlai hian zu in nasa ah erawh damdawi hian hna a thawh chak loh avangin a damna rate hi a sang lo niin an sawi.

TB leh HIV chu a kal kawp duh tih sawiin Health Department thawktute chuan, “Tun dinhmuna kan patient neih 10% vel hi HIV positive an ni a. Mi in HIV a kai tawh chuan a taksaa ral do tur sipai kha HIV hrik in a ei chhiat awlsam vangin TB an kai duh hle a, thihpui ta pawh mi thahnem tak an awm a ni,” tiin HIV vei damlo thihpui tam ber chu TB a ni tih an sawi bawk.