Mimal enkawlna hnuaia awm a tul thin tih sawi

Chief Minister Lalduhoma chuan Sawrkar Department hnuaia enkawl hmun thenkhat luah tlak loh a awm thin avangin mimal enkawlna (privatisation) hnuaia awm chu a tul chang awm tih a sawi.

Chief Minister Lalduhoma hian niminpiah khan ‘ZX Eden Tamdil Lake Resort’ chu hawngin Sawrkar Department hnuaia enkawl hmun thenkhat luah tlak loh a awm thin avangin mimal enkawlna (privatisation) hnuaia awm chu a tul chang awm tih sawiin, he Resort pawh hian hma a sawn zawk theih nan Tourism Department chuan mimal enkawl turin a hawh tir (outsource) ta tih a sawi a. ZX Eden Tamdil Lake Resort neitute chuan kum 2023 atang khan tlawm takin bul an tan tih sawiin, an thawhrim rah hmuh theia a awm chu lawmawm a tih thu leh chhungkaw tam tak eizawnna a siam sak chu lawmawm a tih thu a sawi a, a enkawltute chu mi tam tak tana malsawmna ni tura duhsakna hlanin, theihtawp chhuah zel turin a fuih nghal bawk a ni.

Chief Minister chuan Tamdil chu Mizoram Dil neih zinga hmingthang ber pawl a ni tih pawh sawiin, Department pathum- Fisheries, Forest leh Tourism hnuaia enkawl niin, Tamdil Management Committee chu DC kaihruaina hnuaiah din a ni bawk tih a sawi a. Tamdil chu tha taka enkawl turin leh khualzin hip thei tura tan la turin Line department te chu a chah nghal a ni.

Kum 2020 khan ZX Bamboo and woodworks te hian thing leh mau hmanga Inchhung bungrua siamin bul an tan a, kum 2023 July atang khan Tourism Privatisation Scheme hnuaiah Tamdil Lake Resort hi kum 15 chhung an enkawl dawn a ni.