Serchhip District-ah Sawhthing lei leh tan a ni

Mizoram sawrkar chuan Serchhip District Agriculture Marketing Board (DAMC) kaltlangin loneitute Sawhthing tharchhuah chu a lei leh tan ta a, nimin khan a thawh hnihna atan Chhiahtlang Secondary Collection Centre (SCC)-ah Sawhthing hi buk tan a ni.

DAMC in a lo rel tawh angin Serchhip District chhunga SCC hrang hrangah Sawhthing lei hi chhunzawm leh tan mek a ni a. SCC te hian an Bial theuha khaw hrang hrang te tharchhuah beisei zat leh SCC kudam a leng thei zat chhut chungin lei zat tur an siam a, a thawh hnihna atana a hmasa ber ni turin nimin khan Serchhip/Chhiahtlang SCC-ah Sawhthing te hi buk tan a ni.

Serchhip/Chhiahtlang SCC bikah hian tunkar ah Hriangtlang, Chhiahtlang leh New Serchhip South Sawhthing te lei tan tum niin Bag 2000 buk zawh hman tum a ni a. Sawhthing buk turte hi uluk taka endik a ni a, bun ruah leh vek niin a tha lo leh hlui deuh te thliar hrangin, a chi siamna ang chi te chu pawm a ni dawn lo a ni.