Sangha khawitu pawl ten Assembly an hmang

Serchhip District Fish Farmers Association chuan Inrinni khan Serchhip Press Club-ah Assembly neiin an pawl hruaitu tur thlanna an nei.

Serchhip District Fish Farmers Association Assembly hi an President Kapliana Pachuau chuan kaihruaiin an thurel zingah cheng nuai 400 chuang sen tawhna Thenzawl-a Sangha chi dah-khawlna tur, Brood Bank tun thlenga function hlei thei lo chu Serchhip District MJA Member te phungbawm ah sawmin tlawh a zirchian nise an ti a, Sangha Dil leh Thlam khawih ching, finfiahna mumal tak nena report thei te chu lawmman ah Rs.1,000/- zel pek nise an ti bawk. Hei bakah hian Serchhip-ah Sangha chaw siamna leh Sangha man sa vawnthatna tur, Mini Ice Plant din a nih theihnan Fisheries Department lamah ngenna thlen nise, Sangha chaw, Len, Lensuah leh a hrutna bakah tuilakna Pipe te Subsidy-a hnianghnar zawka lei tur a awm theih nan Department hotute hnenah ngenna thlen nise an ti a, Sangha Rate kg khah Rs. 450 an lo bituk sa chu rin zui leh nise an tih bakah hei hi Sangha Dil nei ten zawm hram nise an ti bawk.

Serchhip District Fish Farmers Association te hian chawhnu lamah kum 2025-2027 chhunga an hruaitu tur thlanna neiin President-ah Kapliana Pachuau (Bazar Veng); Vice President-ah Hmangaihthanga (Vengchung); Secretary-ah HL. Muanthanga (AOC Veng); Asst. Secretary-ah Kaptluanga Ralte (Vengchung); Treasurer-ah LR. Bawlliana (Bazar Veng) leh Fin Secretary-ah H. Thangtluanga (Leisang Veng) te an thlang bawk a ni.

Serchhip District Fish Farmers Association hnuaiah hian Serchhip District chhung khaw hrang hrang atangin Member mi 308 an awm mek a, tun tuma Assembly-ah hian Member thahnem tak kalin an pawl inkaihhruaina Dan an siam chu pharhin siamthat ngai te an siamthat hnuah an pawm bawk a ni.