National Commission for Scheduled Tribes (NCST) Chairman leh Member-ten Siaha an tlawh

National Commission for Scheduled Tribes (NCST) Chairman Antar Singh Arya leh member dangte chuan nimin khan Siaha tlawhin sawrkar hotute leh tlawmngai pawl hrang hrang hruaitute an kawm bawk.

National Commission for Scheduled Tribes (NCST) Chairman leh Member dangte hi Helicopter hmangin Siaha-ah kalin Mizoram Sawrkar leh MADC a mi pawimawh ten an lo hmuak a, hemi hnu hian MADC a CEM Bungalow tual-ah inkhawm neiin NCST Chairman Antar Singh Arya chuan amah lawmna programme buatsaihtu Dy. CEM leh a thawhpuite bakah Mizoram sawrkar hotute chu lawmthu a hrilh a, NCST chu Tribal te tana thawk tura din an nih angin ST te hamthatna turin kawng hrang hrangin hna an thawk thin tih a sawi a, India ram Prime Minister leh President pawhin kawng hrang hranga tribal te hmasawnna chu an ngaipawimawh takzet tih a sawi bawk. Hnam ziarang leh tawng humhalh a nih theih nana Autonomous District Council an hmuh theih nana theihtawpa lo beitu hruaitu hmasate zarah ADC an nei thei chu malsawmna a ni tih pawh sawiin, Hnam anga a dinchhuah a, hma a sawn zual zel theih nan dikna leh rinawmna nen Ram leh Hnam tan theihtawp chhuah chhunzawm zel turin a chah a, zirlai naupang kalkhawmte pawh nakin lawka ram hruaitu turte an ni tiin zirna-ah tang sauh sauh turin a fuih bawk.

He hunah hian MADC Dy. CEM S. Lalremthanga chuan NCST Chairman leh Member-te chu Scheduled Tribes-te tana an thahnem ngaihna ah lawmthu a hrilh a, Hnam humhalhna leh hmasawnna kawngah theihtawp chhuahpui turin a ngen a. Siaha Bawrhsap VL. Hruaizela Khiangte pawhin NCST Chairman leh member-te chu District mipui aiawhin lawmthu a hrilh a, Siaha District dinhmun tlangpui tarlangin, District mipuite hamthatna ngaipawimawha an rawn kal thei chu ropui a tih thu a sawi a. Siaha District hmasawnna turah theihtawp chhuahpui turin a ngen bawk.

NCST Chairman Antar Singh Arya leh Member dangte hian Siaha a tlawmngai Pawl hrang hrang, ECM Assembly MTP Hqrs., MCHP Hqrs., MSO Hqrs. leh MHP Hqrs. hruaitute chu kawmin an mamawh leh duh te an lo thlen a, MADC leh LADC a hotute nen inkawmna hun an nei chhunzawm nghal bawk a, harsatna hrang hrang a hnena an thlente sutkian a nih theih nan theihtawp chhuahpui a tum thu a lo hrilh a ni.

Siaha tlawhtute hi National Commission for Scheduled Tribes (NCST) Chairman Antar Singh Arya bakah Member dang Dr. Asha Lakra, Jatothu Hussain leh Nirupam Chakma te an ni a, Siaha-a hun an hman zawh hnu hian Aizawl an pan leh nghal a ni.