Isua Thawhlehna ni lawm a ni

Khawvel chhandamna atana khenbeh a nih hnu a mihringte'n chatuan nunna an neih theihna atana Isua Krista thihna hneha a Thawhlehna Ni, Easter Sunday chu khawvel ram dangte rualin Serchhip-ah pawh nimin khan urhsun taka hman a ni.

Easter Sunday-ah hian zing khawvar rualin Salvation Army thalaite chuan rimawi nen Isua thawhlehna thu hi puangin Kohhran hrang hrangah thalaite pawhin ni chhuah rualin Biak In leh Biak In tual-ah te Pathian biak inkhawm an nei bawk a. Chhun lamah Kohhran hrang hrang ten Inkhawm neiin thupui hrang hrang hmangin Pathian thuchah an ngaithla a, nizan lam thleng khan hun an hmang a ni.

Catholic Kohhran chuan Sakhaw hunpui bikah chuan Judate ni chhiar dan zawmin Inrinni khaw thim fel atangin Isua Thawhlehna hi an lawm a. He inkhawm hi Catholic Kohhran-ah chuan inkhawm urhsun ber leh ropui bera neih niin Sathau Khawnvar chhi engin kawngzawhna neih a ni a. Serchhip-a Catholic Kohhran Biak In pathum te chuan kumin hian a huho-a hmangin nizan khan Bati nena kawngzawh hi an nei a ni.