Tlabung-ah DM&R Safe House hawn a ni

Ministry of Development of North Eastern Region (DoNER) atanga sum hmuh cheng nuai 115 hmanga sak Tlabung-a DM&R Safe House chu nimin khan DM&R Minister Prof. Lalnilawma chuan a hawng.

Tuilian leh chhiatna dang avanga chhiattawkte tlukluhna leh tawmhimna tur, DM&R Safe House hawnna hunah hian DM&R Minister chuan Safe House sakna atana bul tantu sawrkar hmasa leh ruahmanna siamtu Department hotute leh ram petu khawtlang hruaitute chungah lawmthu a sawi a. Safe House chu sum tam tak senga sak a ni chungin hman ngai lo se tih chu a duhthusam leh tawngtaina a nih thu sawiin, hman a tul a nih erawh chuan tumah inthlahrung lovin tangkai taka hmang turin a chah bawk.

Kum 2017 May leh July inkar chhunga ruah nasa taka sur avanga Mizoram puma chhiatna hrang hrang thlengah Mizoram sawrkar DM&R Department chuan sawrkar laipuiah puihna dilin, Memorandum for Seeking Central Assistance siam a ni a. Chhiatna hrang hrang thleng chhawm-dawlna atan DoNER hnuai atangin ‘One time Central Assistance for Rebuilding totally damaged/washed away infrastructure during floods in 2017’ atan cheng nuai 1,483 hmuh niin, he project hnuaiah hian component pathum - Road & Bridges (PWD - nuai 815), Agriculture & Allied Sector (I&WR - nuai 333) leh Social Infrastructure (PWD - nuai 335) te a awm a. Safe House hi Social Infrastructure component hnuaiah awmin, Tlabung bakah hian Sairang-ah sak a ni bawk a, Sairang-a Safe House hi November ni 28, 2024 khan hawn a lo ni tawh a ni.

Tlabung-a Safe House hi tuilian avanga harsatna leh chhiatna dang a lo thlen thulha mihring emaw, bungrua emaw indah lailawkna leh tawm himna atana ruahman a ni a, RCC footing & structure chhawng hniha sak niin, a chhawng chung leh hnuaiah hian pindan zau pakhat ve ve, bathroom pahnih ve ve leh toilet pahnih ve ve te a awm a ni.