MPCC President in Mamit District a tlawh

Mizoram Pradesh Congress Committee (MPCC) President Lal Thanzara chuan ZPM leh MNF sawrkar hnuaiah Mizoram in manganna nasa tak a tawk niin a sawi.

    MPCC President hian nimin khan Dampui, Mamit, Vawngawnzo, Damdiai leh Suarhliap khua te tlawhin ZPM chuan engkim ti thei ah inngaiin an inzuar nia sawiin, “Mahse, a tak takah chuan engmah an theih lohzia Mizoram in a hmu mek a, Mizoram politics inthlak danglamna bul intanna Aizawl khawpuiah Local Council inthlanah Congress an che tha ber, chu chuan Congress party tho leh vat tura mipuiin an duhzia a lantir a ni,” a ti a. “ZPM party-in a intiam angin phur takin kuthnathawktuten Sawhthing an ching a, mahse rilru nâ in an awm hi pawi ka ti takzet. MNF sawrkarah Kuthnathawktute mangang in Chemtum nen Aizawl khawpuiah kawng an zawh a, tun ZPM sawrkarah pawh hian Kuthnathawktute rilru na leh mangang hian rapthlak takin lungawilohna kawng an zawh a thlen hlauhawm khawpin an rilru a na a ni,” a ti a. ZPM leh MNF sawrkar hnuaiah Mizoram in manganna nasa tak a tawk nia sawiin, “Congress a sawrkar chuan Mizoram-ah thlarau malsawm hlimna a thleng a, Mizoram a him a ni,” a ti bawk.