Airport Authority of India kut-a Lengpui Airport hlan chungchang CM hovin AAI ten an sawiho

Chief Minister Lalduhoma chuan nimin khan a Office-ah Airport Authority of India (AAI) hotute Dr. Sharad Kumar, Member (Operations), M Raja Kishore, Regional Executive Director, NER leh an thawhpuite kawmin Airport Authority of India kuta Lengpui Airport hlan chungchang a sawipui.

He inkawmna ah hian Chief Minister Lalduhoma chuan tunhma atang tawhin AAI kuta Lengpui Airport enkawl hna hlan tuma hmalakna a awm tawh thin thu sawiin, “Keini pawhin kan ngaihven nghal bawk a. Amaherawh chu kan beisei angin thil a kal tluang lova, duhthlan tur dang, Mizoram tana tha tawk tak a lo awm bawk si avangin chung mite nena indawrna te chu kan kalpui a ni,” a ti a. Amaherawh chu tunhnaiah Union Home Minister Amit Shah nena an inkawmnaah AAI nena indawrna tharthawh leh tha an tih thu sawiin, “Ti hian kan han indawr thar leh ta a. AAI lamin Lengpui Airport zirchianna te han nei ula, in thu leh hla a zirin kan kal zel dan tur kan sawiho dawn nia,” tiin AAI thuneitute hi a chah a ni.

Union Home Minister leh Chief Minister ten Lengpui Airport AAI kuta hlan chungchanga inbiakna thar neih an rel hnu hian Commissioner & Secretary to CM, GAD Vanlaldina Fanai chu Delhi ah kalin tun thla, April ni 16 khan Ministry of Civil Aviation Secretary leh AAI hotute nen Meeting an zui nei nghal a. An Meeting-a ruahmanna an siam angin AAI Team te hian Mizoram an rawn tlawh ta a ni.

He inkawmna ah hian AAI hotute hian Lengpui Airport tihchangtlun nghal ngai zual nia an hriat te leh hma an lak zel dan tur te Chief Minister hnenah hian an tarlang a. Inkawmna hun tha tak a siamsak avangin lawmthu an hrilh a. Chief Minister hi Adviser to CM TBC. Lalvenchhunga, Commissioner & Secretary to CM Vanlaldina Fanai leh Mizoram Civil Aviation Wing hotuten an tawiawm a ni.

Tarlan tawh thin angin Mizoram sawrkar chuan Lengpui Airport enkawlna hna midang hnena hlan chungchangah hian thui takin hma a lo la tawh a, India ram hmun danga Airport te Airport Authority of India (AAI) leh Private Company ten PPP Mode-a an enkawl dan te zirchiangtu tur pawh indinin Indian Airforce kut-a hlan chungchang te pawh nasa takin a lo zir tawh a, tunah hian AAI kut-a hlan turin hmalakna kalpui a ni leh tan ta a ni.