Buangpui-ah 'Fehchhuah Programme' neih a ni

Thenzawl Civil Sub-Division Office ruahmannain 'Fehchhuah Programme' vawikhatna leh a hawnna chu nimin khan Buangpui VC Hall-ah neih a ni.

Mipuite hnen thleng phaka Sawrkar Department hrang hrang ten hna an thawh theihna tura ruahman Fehchhuah Programme hawnna hi Govt Higher Secondary School Principal H. Lalmawia chuan kaihruaiin Dr. Ch. Lalthafamkima, General Manager, Vety Farm, Thenzawl chuan ASF chungchanga ranvulhtute hriat tur pawimawh a sawi a. Thenzawl Police Station-a Office Incharge Lalzidinga Kawlni chuan New Criminal Law nihphung te leh dan leh thupek chungchanga mipuite hriattur pawimawh hrang hrang a sawi a. MC Apex Bank Thenzawl Branch Manager Lalsiamthara chuan sum vawn dan leh peipun dan chungchang a zirtir bawk a. Chawhnu lamah CHC Thenzawl leh Integrated Ayush Hospital Thenzawl ten mipuite tan a thlawna inentirna hun buatsaihin SDO(C) Office bakah Apex Bank Thenzawl te pawhin Help Desk buatsaihin mipui ten awlsam taka an dawr nghal theih turin an inchhawpchhuak a ni.

He programme hi Thenzawl Civil Sub-Division chhunga mipuite hnen thleng phaka Department hrang hrang ten hna an thawh theih nan leh Department awm chhan mipui ten an hriat theihna tura ruahman a ni a. Fehchhuah program hi tum dangah buatsaih chhunzawm zel tum a ni. Mipuite tan Common Platform siamin heng hunah hian Department hrang hrang ten Scheme awmsa leh Programme an kalpui mek te zirtirna leh sawizauna hun an hmang thin dawn a. Thlatin chawlhkar hnuhnung berah bial chhung khua/veng pakhat thlan bikah VC te nen kalpui thin tura ruahman a ni.