Kumin ah Lokayukta in thubuai 14 a dawng tawh

Kum 2019 March 11-a Mizoram Larsap in Chairman a lakluh hnua a taka hna thawk tan, Mizoram Lokayukta chuan eiruk thubuai chhui tur 67 a dawng tawh a, kumin 2024-ah thubuai 14 a dawng tawh.

Lokayukta tarlan danin thubuai chhui tur an dawn tawh 67 zinga 26 chu titawpin Regular Investigation 23 neih mek a ni a, thubuai 48-ah chhui chianna hmasa/Preliminary Enquiry (PE) neih tawh a ni a, PE Report 44 dawng tawhin la tihfel loh (pending) 10 a awm a, thubuai 7 chu PE neih hmaa chinfel a ni.

Mizoram Lokayukta hian kum 2019-ah thubuai chhui tur pakua an dawng a, kum 2020-ah thubuai 15, kum 2021-ah thubuai 13, kum 2022-ah thubuai 10, kum 2023-ah thubuai paruk leh kumin 2024-ah thubuai chhui tur 14 a dawng tawh a ni.

Kumin chhunga Mizoram Lokayukta in thubuai 14 a dawn zingah hian Mizoram Police Hqrs. hnuaia Police Quarters 26 sak chungchanga contractor thlan dan dik lo nia sawi chungchang tunhnaia a dawn a tel a ni.