Nagar Van Yojana Scheme (City Forest) hnuaia Entlang-a hmalakna MJA ten a hmunah an tlawh
Serchhip Sub-Hqrs. YMA in an enkawl, Entlang Social Forestry-ah hian Nagar Van Yojana hnuaiah cheng nuai 132 sengin Environment Forest & Climate Change Department chuan hma an la a, helai hmuna an hmalakna te chu Serchhip-a Forest RO Lalsangpuia leh helai hmuna hnathawktute chuan MJA Member te hi hrilhifiahin he hmalakna hnuaiah hian thing engemaw.zat phun belh niin Fur ruahtui luangral tur khawlna tur hmun ruk (6) ah siam a ni a, ruahtui dahkhawlna tur siamin ke-a ramngaw fanna tur kawng siam a ni a, Interpretation Hall tha tak a chhawnga sain a chungah hian helai hmun zirchiang duhte tana riah theihna turin Khum dah a ni bawk a, Dil awmsa chu cheibawlin a chunga Lei dawh hna pawh thawh a nih bakah hmun dang pakhat-ah Lei dawh a ni bawk a. Hei bakah hian a Gate pui pawh tha taka siamin Building awmsa te pawh chei thar a ni bawk a ni.
Entlang Social Forestry hi a tirah ‘Village Reserve Forest’ tih niin Serchhip khua VC pakhat enkawlna hnuaia a awm lai atang khan lo enkawl a ni tawh a, kum 1983 atang khan YMA kutah hlan niin ‘Social Forestry’ tih a ni zui a, Serchhip Branch YMA ten enkawlin kum 1993-a Serchhip-a YMA Section hrang hrangte Branch hrang hranga then an nih khan Serchhip Joint YMA enkawlna hnuaiah a awm leh a. Kum 2008-a Serchhip Sub-Hqrs. YMA din a nih avanga Joint YMA thiah a nih tak hnu khan Sub-Hqrs. YMA hian a enkawl zui hna a thawk a. A enkawltu tur mi pakhat Vawiin thlengin an la ruai a, a zau zawng hi Hectare 100 a ni.
Helai hmun hi Research beitu zirlai engemawzatin an zirbingna behchhanah an rawn hmang tawh thin a, Thing leh Mau upa tawh tak takte bakah ramsa leh sava chi hrang hrangte an awm a. Nagar Van Yojana hnuaiah hian ramngaw tichhe chuang lovin khawpui in boruak tha a hmuh theihna tur atan kawng hrang hranga cheibawl tur niin mipuite tan pawh tlawh manhla ni thei tura ruahman a ni a. Tunah hian he hmalakna hi zofel thawkhat tawhin Serchhip Sub-Hqrs. YMA chuan thla thar-ah khian a hawnna nei turin ruahmanna an siam a, Chief Minister chu he hmalakna hawng tur hian beisei a ni bawk.
Comments
Post a Comment