Kawng chhia leh tuialhthei man sang avangin MCVU ten lungawi lohna an lantir

Kawng chhia leh tuialhthei man sang avanga lungawilohna lantir nana Sumdawng lirthei neitute intelkhawm, Mizoram Commercial Vehicle Union (MCVU) ten nimin zing dar 6:00 atanga an lirthei hrang hrangte an din tir chu nimin tlai dar 4:00 khan tihtawp a ni.

Mizoram Commercial Vehicle Union (MCVU) chuan nimin-a lungawi lohna an lantir chu hlawhtling thawkhata an inhriat thu an sawi a. An pawl President PC. Malsawma sawi danin, tuialhthei man tihhniam an nawr chhan chu khawvel kalphungah tuialhthei man a toin lirthei chuanman leh hman man a to nghal zel a, chu chu mipuiin an tuar nghal zel a. Mizoram sawrkarin tuialhthei man an tihsan chu tawlh ve hret se, lirthei chuan leh hman man tih to a ngai lo ang a, mipuiin an tuar lo thei ang tih ngaihtuahna nena lungawilohna chu lantir an nih thu an sawi a ni.

Nimin-a sumdawng lirthei thenkhat an tlan loh avang hian khawpui chhunga kawngpui a thawl phah lutuk lo niin Traffic Police Duty te chuan an sawi a, Two-Wheeler Taxi leh Taxi te an vaia sawrkarin a tlantir vang a nih an rin thu an sawi a. Two-Wheeler Taxi Driver leh Taxi Driver te chuan nidang aia tlanna a tam phah chuan loh thu an sawi thung a. MCVU lungawilohna lantir avang hian City Bus chuang thin School naupang engemaw zatin sawrkar Bus tlan lohna kawngah chuan harsatna an tawk a, Transport Department Bus tlanna kawngah pawh Bus a chuan tum tam takin nidang aiin Bus an chang rei tih an sawi bawk a. Sumdawng lirthei nuar tur avang hian mipuite harsatna sutkian nan sawrkar chuan MST Bus 14 khawpui chhungah a tlantir a. Zing dar 7:30 atanga tlai dar 5:00 thleng khan sawrkar Bus te hi an tlan a ni.

Tarlan tawh angin, MCVU hmalakna hi Mizoram Taxi Association leh Aizawl Two-Wheeler Taxi Association in an thlawp ve lo a. Mizoram Taxi Association President Caleb Ralte chuan MCVU te an thlawp ve loh chhan chu MCVU member an nih loh vang leh mipuite harsatna siam zawnga lungawilohna lantir an duh loh vang a nih thu a sawi a. Khawpui mai ni lo, thingtlang lam thlengin nitin eichawp zawng, damdawiin kal ngai leh midangten an tawrh tur an ngaihtuahin tha an tih loh thu an sawi a ni.

Aizawl Two-Wheeler Taxi Association pawhin MCVU huaihawt lungawilohna lantirna chu member tam zawkin an duh loh avanga thlawp lo an nih thu an sawi a. Two Wheeler Media Publicity Secretary Lalremkima chuan Committee angin MCVU hnenah an thlawp thu an sawi hmasa zet naa an member te ngaihdan an lakah midang lirthei khalh tam tak an awm thu leh chhungkaw chawm an nih bakah harsatna hrang hrang an sawi avangin member tam zawk duhdana kalin an tlawp leh ta lo tih an sawi a ni.