Dungtlang-ah Cultural Meet leh Vangpui Kut hmang

Art & Culture Department leh Dungtlang Branch YMA te tangkawp buatsaihin nimin khan Dungtlang khuaah ‘Cultural Meet leh Vangpui Kut’ neih a ni a, he hun hi Art & Culture Minister C. Lalsawivunga chuan hmanpuiin Vangpui Kut chu Mizo culture vawnhim nana thil pawimawh tak a nih thu a sawi a, mahni hnam zia zahpuite chu Hnam dingchhuak an awm ngai lo a, an ral thin tih a sawi bawk. Dungtlang khua Vangpui Kut hi kumtin hman thin niin kumin hi tum 38 an hmanna a ni a, kum 2021 atang khan Aizawl a Branch YMA an thlanchhuah te an sawm thin a, kumin hian Ramhlun North Branch YMA te sawmin Ramhlun North Branch YMA atang hian member 60 chuang an kal a ni.

He hunah hian Dungtlang leh a chhehvel khaw hrang hrang – Sesih Branch, Leithum Branch, Lianpui Branch, Khuangleng Branch, Khuang-thing Branch leh Vaphai Branch YMA leh School hrang hrang ten Mizo hnamlam an entir a ni.