Serchhip-ah Youth Icon te ropui taka lo lawm an ni
LBS Suzuki Youth Icon-2024 a Serchhip District atanga tel zinga lawmman pakhatna dawngtu Bawktlang khuaa cheng Lalsangliana leh pathumna ni ta Then-tlang khaw mi Lalbiakkima te hi Mizo Zaimi In-zawmkhawm (MZI) Hqrs. Serchhip bultumin Serchhip Bazar-ah ropui taka lo hmuah an ni a, Serchhip District Bawrhsap Paul L. Khuma pawhin he hun hi hmanpuiin Serchhip District in ‘Youth Icon’ a nei thar leh ta chu lawmawm a tih thu leh District mipuite pawhin an chawimawi thiam chu lawmawm a tih thu a sawi a, “Hei hi kan talent kan in promote sakna vek a ni,” a ti a. Youth Icon 2024 Lalsangliana chu District Election Office ten ‘SVEEP – Ambassador’ atan an lo ruat nghal thu leh District Adminstrator a nihna angin Ruihhlo Dona (Drugs Awreness) lamah pawh hmalak puitu ni turin a sawm nghal bawk.
Youth Icon 2024-a Serchhip District atanga hlawhtlinna changtute lawmna hun hi MZI Hqrs. Serchhip President Lalengliana Ralte chuan kaihruaiin anmahni bakah hian zaithiam hrang hrang ten he huna kalkhawm mipuite chu zaiin an awi a, thilpek chi hrang hrang an hlan bawk a ni.
Youth Icon 2024 Lalsangliana hian nimin zing khan Aizawl atangin an khua, Bawktlang hi a pan a, a paltlang khaw hrang hrangah mipui ten ropui takin an lo hmuak hlawm a, Serchhip District chinah chuan khaw hrang hrang ten ropui taka lo hmuakin nizan thimhlim khan an khua hi a thleng a, khawtlang mipui ten ropui takin an lo hmuak a, Vawiin hian Youth icon lawmna hun hi khawtlang huapin an hmang zui dawn a ni.
Tarlan tawh angin LPS in Youth Icon thlanna an buatsaih ah hian Serchhip District atangin mi pali lai chu lawmman pakhatna dawng tur hian thlan an lo ni tawh a ni.
Comments
Post a Comment