Mipui zahlohna a nih thu MNF Treasurer in a sawi

MNF Treasurer Lalruatkima chuan Local Council leh Village Council term pawh tawi chu a thlangtu mipuite zahlohna niin a sawi.

Nimin a Chalfilh Bial tlawha zin MNF Treasurer Lalruatkima chuan Home Minister K. Sangdanga'n Local Council leh Village Council term pawh tawi a nih tur a sawi chu a thlang tlingtu mipui zahlohna a nih thu sawiin, “Mipuiin kan aiawha duh taka kan thlantlin VC te ZPM sawrkar-in an thawhpui thei lo hi a pawi hle. VC/LC te hi Development kaltlangna tur Agency dik an ni. Chu chu ZPM sawrkar hian an palzut ta vek mai a ni,” a ti a. “LC leh VC ni laite hmang duh lovin VDC an dinchilh a, hei hi mipui zahlohna nasa tak a ni a, democracy palzutna a ni,” a ti bawk.

ZPM chuan an party ni lo LC leh VC thawhpui an tum lo ringawt mai nia sawiin MNF Treasurer chuan, “Mipui, a thlang tlingtute an zah loh hle. Mipui sawrkar an din lo chiang hle. Kalphungthar hi kalphung a zawnga nawi ber leh ramhlui zia kalpui nasa ber, party mi vulh nasa ber an ni,” a ti a. “ZPM hian LC leh VC inthlan hi Sawhthing thar hmaa inthlan an duh niin a lang, Sawhthing-ah hian an mualpho an ring niin a lang. ZPM hi anmahni reng mai an thawkho tha lo a, midang phei chu thawho pui harsa an ti hle a ni,” tiin sawrkar sum renchem hauh lovin an ham bawrh bawrh niin a sawi bawk.