MCVU ten Vawiin-ah lungawilohna an lantir dawn; Mipuite harsat lohna turin sawrkar in hma a la

Mizoram Commercial Vehicle Union (MCVU) chuan Oil man sang leh kawng chhe nasa lutuk avanga lungawilohna lantirin Vawiin October 23, 2024 hian Service lovin an ding dawn tih an sawi.

Nimin-a Aizawl Press Club-a thuthar thehdarhtute an kawmna ah MCVU chuan lungawi lohna an lantir turah hian YMA Rorel inkhawmpui a awm dawn avang leh Kohhran Inkhawmpui programme te a lo awm avangin ni khat din nise an tih thu sawiin, hetianga lungawi lohna lantir a ngai tur hi pawi an tih thu an sawi a. Lungawi lohna an lantir chhan hrang hrangte pawh sawiin, Mizoram pumah inkalpawhna kawng a chhe em em vek tih an sawi a, Chhiah lak leh Oil man tihpun chu an do lo tih sawiin, amaherawhchu vawi leh khata a pung vak mai hi an hrethiam lo tih an sawi a. Mizoram pumah kawng a chhia a, lirthei-a eizawngtute a nghawng nat em em laia sawrkar in Oil man a tisang vak chu hun lo an tih thu leh Oil man to hian lirtheia eizawngte chauh nghawng lovin chhungkaw tih te a nghawng thu te pawh an sawi a ni.

Hetihlai hian Home Minister K. Sapdanga chuan nimin khan thuchhuah siamin Mizoram Commercial Vehicle Union-ten Oct. 23, 2024 atanga tlan lova nawrh an puan chu sut leh turin an ngen tih sawiin, MCVU nawrh hi an thulh lo a nih pawhin mipui nunphung a kaihlak lohna turin ruahmanna chi hrang hrang siam a nih thu a sawi a. Hemi ang hian District tinah SP ten a tam thei ang Police duty tur ruahmanin a tul angin Batallion mite pawh detail tur a nih thu te; MST Bus-te Aizawl khawpui chhungah service in zing dar 7:00 atangin Ngaizel leh Zemabawk atangte in a inzata inthenin an tlan tur thu te; MCVU hi a nuar tak tak a nih chuan an nawrh chhung chu Aizawl khawpuiah lirthei intlanchhawk awm loin Taxi te chu an tlan phalsak an nih dawn thu te; Transporter pawl dang, nawrhna thlawp ve lote chu buaina an tawh lohna turin uluk taka venhimna ruahman sak tum an nih thu leh Mizoram sawrkarin State Transport Authority hmanga public service phalna Plying Permit a pekte chuan dilnaa STA thupek zawm tura an intiamna lo ennawn leh tura chahin, hming an ziah hnan an intiamna zawm thei lote hnena permit kawltir reng chu a remchang zui kher lo ang tih te a sawi bawk a ni.

Mizoram Commercial Vehicle Union ten Vawiin a lungawi lohna lantir an tum lai hian All Mizoram Petroleum Dealers Association, Mizoram Taxi Association, Petroleum Entrepreneur & Transporter Union Mizoram, Mizoram Truck Driver Association, Mizoram Oil Tanker Driver Association, Mizoram Indane Driver Welfare leh All Mizoram Commercial Tripper Association (Owners & Drivers) te chuan nawrh ve an tum lo tih a sawi bawk.