END Serchhip-a thawkte leh MJA te an inkawm

Serchhip-a Excise & Narcotics Department hotute chuan nimin khan Serchhip-a thuthar theh-darhtute leng-ah sawmin an hmalakna hrang hrang an sawipui.

Asst. Commissioner of Excise & Narcotics, Serchhip Pisa-a an inkawmna ah hian Asst. Commissioner of END Malsawmkima chuan an hmalakna tlangpui sawiin, Zu leh ruihhlo dona kawngah thawktu indaihlo chung pawhin an theih anga hma an lak reng thu a sawi a, tlawmngai pawl te, Kohhran leh mipuite nen thawhhona tha tak nen hmalak tlan an mamawh thu a sawi bawk a ni.

He hunah hian Excise & Narcotics Department-a thawktute chuan thawktu indaihloh avanga harsatna an tawh thu sawiin, tunah hian thawktu mi 37 awm mah se hna hrang hrangte insemin an indaih lo hle tih an sawi a, hei bakah hian lirthei hman tur pakhat chauh an nih thu leh Office leh Staff Quarters Building te pawh a theih anga thawmthat an mamawh thu te an sawi a ni.

Heng bakah hian Zu leh ruihtheih thil man kawngah mipuite pawhin an thu hriat hrang hrang hrilh thin se an duh thu sawiin, Zu leh ruihtheih thil an man pawhin mnipuite zing atangin thuhretu an mamawh thin angin thuhrehtu ah tan hreh lo tlang se an duh thu te an sawi a. Kumin chhungin zu leh ruihtheih thil kaihhnawih ah thubuai 270 vel an ziahluh tawh thu sawiin, heng zingah hian damdawi (Heroin) kaihhnawih a tam thu te pawh an sawi bawk a ni.

Serchhip-ah hian Excise & Narcotics Department hi Asst. Commissioner hova awmin Inspector leh Asst. Inspector pakhat ve ve an awm a, Asst. Sub-Inspector 4 awmin damlohna leh thildang avangin tun dinhmun a hna thawk thei mi pahnih an awm mek a, Head Constable mi 3 leh Wireless Operator mi pathum awmin Driver mi pakhat an awm mek bawk a, Constable mi 17 awmin a dangte chu Office-a thawk te an ni thung a ni.