Mi nawlpui ban phak, Sports Infrastructure tha siam a pawimawh thu Sports Minister in a sawi

Sports Minister Lalnghinglova Hmar chuan infiamna chi hrang hrangah, Mizo thlalaite thiamna leh theihna haichhuak tur chuan mi nawlpui ban phak, Sports Infrastructure tha siam a pawimawh thu a sawi.

Mizoram Police Sports & Cultural Control Board bultuma ‘Mizoram Police Football Club Golden Jubilee’ lawmna hun nimin-a 1st Bn. MAP Parade Ground, Armed Veng-a neih a hmanpuina ah he thu hi sawiin Sports Minister chuan heng infiamna hmanga hlawhtlinna tluantling nei tur chuan kan lawm zawng leh nuam tih zawng Sports discipline chauh thlang lovin kan hmasawnpui theih tur kan thlan thiam a pawimawh thu a sawi a. Mizoram sawrkar flagship program, Bana Kaih Scheme kaltlangin nasa taka Sports tihmasawn tum a nih thu sawiin, Sports discipline hrang hranga thalaite theihna haichhuahna tur ‘Talent Identification’ leh an theihna tuaihriamna tur ‘Coaching’-te kalpui tum a nih thu a sawi a. India’s Olympic Vision 2036 tinzawn chunga Mizo infiammite tan ruahmanna kalpui thiam a pawimawh thu pawh a sawi bawk.

Sports Minister chuan Mizoram Police Football Club chu Mizorama Football tihmasawntu hmanraw pawimawh tak a nih thu leh ram pawn thleng a Football hmang a inelna hrang hranga Mizoram hming timawi thintu a nih thu sawiin, Golden Jubilee thleng thei a an inkaihhruaina leh enkawlna chu fakawm a tih thu leh a lawmpui thu a sawi bawk.

He hunah hian Mizoram DGP Anil Shukla IPS chuan inlawmna thu sawiin, Stephen Lalrinawma MPS chuan MPFC chanchin a tarlang a. Report-a tarlan danin kum 1974 khan KC. Thanga, Commandant, 1st Bn. MAP hmalaknain BN Mullick Memorial All India Police Football Championship-a tel tur Mizoram Police Football Club din a ni a, H. Lalchhuanliana chu Team Captain niin Tournament hrang hrangah te telin rampawn a inelna thlengin an inlan chho zel a, inelna chi hrang hrangah Champion tawhin 71st BN Mullick Memorial All India Police Football Championship 2023-ah an Champion bakah MPL 10-ah pawh an Champion bawk a ni.