MNF Party dinchampha vawi 63-na lawm a ni

MNF President Zoramthanga chuan an party mipuite chu phur taka leh tha thlah hauh lova kan ram kan hnam tan theihtawp chhuah zel turin a sawm.

MNF din champha vawi 63-na lawmna inkhawm nimin-a Aizawl Mizo Hnam Run-a neih ah MNF President Zoramthanga chuan MNF chu 'Pathian leh kan ram tan' tih thuthlung neia din a nih avangin Mizoram-ah ngei pawh Party 30 chuang zet lo zuihral tawh karah Pathian in kum 63 an din champha a hruai thleng tih a sawi a, “Pathian chuan min hruai zel dawn a ni,” tiin, Zoram hmun hrang hranga awm MNF te chu phur taka leh tha thlah hauh lova kan ram kan hnam tan theihtawp i chhuah zel turin a chah a, “Pathian hruaina a innghat tlat a, hma lam pan zel tur kan ni,” a ti bawk. 

MNF President chuan India Airforce kutah Lengpui Airport chu Mizoram Sawrkarin pek an tum chuan MNF chuan a tawp thlengin an do dawn tih pawh he hunah hian sawiin, Lengpui Airport chu kan nunna hnar, ramdang nen kan inpawhna a ni tih a sawi a. Ramri buai chungchang leh Covid avanga harsatna kan tawh tawhte sawiin, “Silchar kawng a ping a, Rail kawng a ping a, a buaithlak zia kan hre tawh. Chuvangin, Airport hi midang kutah hlan a rem lo,” tiin NGO, Political Party, Kohhran leh ngaihtuahna fim tak hmang phak thangtharte pawhin an remtih a rin loh thu a sawi bawk.