Deputy CM chungchang thu thang dik lo niin sawi

Chief Minister Lalduhoma chuan BJP atanga MLA pakhat Deputy Chief Minister-a lakluh chungchanga thu thang chu thu diklo a nih thu a sawi.

BJP nen sawrkar intawm siam a, Deputy Chief Minister a BJP MLA pakhat lakluh a ni dawn ni awma sawi leh BJP MLA Dr. K. Beichhua nena Delhi a zin duna BJP hruaitute hmu a puhna chungchangah thuthar thehdarhtute zawhna te chhangin Chief Minister Lalduhoma chuan Dr. K. Beichhua nen hian an zin dun lo niin a sawi a. Kar kalta Nilaini zan-a Delhi-a Assam Rifles hotute nena inremna an ziahna a Dr. Beichhua a lo tel ve a hmuh thu sawiin, hetah hian ZPM, MNF leh BJP MLA te pawh an tel niin a sawi a. Assembly inthlan hnuhnung berah ZPM chu party mala sawrkar siam thei turin thlantlin an ni a, party dang thawhpui an mamawh lo tih a sawi a. He thil hi thuthang dik lo, khawi atanga lo chhuak nge a nih pawh hriat loh a nih thu a sawi a ni.

Congress hruaitu leh Minister hlui John Rotluangliana chuan Zirtawpni khan Aizawl-a Congress Bhavan-ah Mizoramin Deputy Chief Minister a nei mai thei tih sawi a hriat thu a sawi a. “An tih ngam loh chuan BJP in an hrek an hlau si a, indawrna a kal mek tih hi chiang takin ka hre thawi a, enge lo thleng dawn i lo thlir ang u,” tiin a sawi bawk a ni.