Ruihhlo-Zirlaite hmelma tih hmangin kawngzawh a ni

Mizo Zirlai Pawl (MZP) dinchampha phak pualin Inrinni khan Aizawl-ah ‘Ruihhlo-Zirlaite hmelma’ tih thupui-a hmangin Ruihhlo Do Kawngzawh neih a ni a, he hun hi School Education Minister Dr. Vanlal-thlana leh Excise & Narcotics Minister Lalnghinglova Hmar ten an telpui a ni.

Kumin-a MZP dinchampha October 27, Zirlaite Ni ti-a hman thin hi Pathianni a nih avangin MZP chuan Inrinni khan hun an hmang a, Aizawl khawpui chhunga School 25-a zirlai naupang ten Millennium Centre leh Sikulpuikawn atanga kawng hi zawhin Aizawl Vanapa Hall kawt-ah an intawkkhawm a, he hunah hian School Education Minister Dr. Vanlalthlana chuan, ‘Mizoram hian hmelma hrang hrang kan nei e’ kan ti thin tih sawiin, “Kan hmelma lian ber te zinga ami chu Ruihhlo hi a ni,” a ti a, tunhnaiah mipa kan thi nasa hle tih pawh sawiin, hei hian Ruihhlo in min luhchilh nasat zia a lantir tih a sawi a. “Ruihhlo hi Middle sikul leh High School zirlaite a bulthut a nih avangin, inzirtirna kalpui tan a ngai tawh a. Sawrkar bakah Kohhran pawhin tan kan lak nasat a ngai hle tawh a. School Education Department pawhin ruahmanna kan siam mek a, kan inbuatsaih nasa hle a ni,” tiin Middle School zirlai naupang te chhiar duh tur zawnga Ruihhlo chungchang te, Nun dan mawi leh tha chungchang te leh naupang siam that nana thil pawimawh dang te chu Comic bu a siam a, buatsaih mek a nih thu a tarlang bawk.

He hunah hian Excise & Narcotics Department changtu Minister Lalnghinglova Hmar pawhin Yahoo leh Google indawr chungchanga leh Yahoo in duhthlanna a hman sual te, Nokia in Android hman chungchanga duhthlanna a hman sual chungchang te chu tehkhin thu-ah hmangin, vawi khat duhthlan sual a pawi thu a sawi a. “Vawi khat tihsual avangin kan nun pumpui a chhe vek thei a. Tuman drugs ngawl vei kan duh hauh lovang, chuvângin a tlai hmain i inveng fimkhur ang u,” a ti bawk.

MZP hi October ni 27, 1935 khan Shillonga-ah din a ni a, President hmasa ber chu R. Buchhawna niin tunah hian MZP General Headquarters hnuaiah Mizoram chhung leh pawn ah Headquarters 13, Sub-Headquarters 51, Branch 121 a awm mek a. Hnam Bil zirlai pawl 7-in MZP an zawm bakah Institution 25 te nen a thawkho mek a. MZP dinchamphaphak hi kum 2007 khan Mizoram sawrkar chuan ‘Zirlaite Ni’ atan puangin he ni hi Zirlaibu piah lamah zirlaite tana tangkai tur thil chi hrang hrang inzirtirna atan hman thin a ni.

‘Ruihhlo-Zirlaite hmelma’ tih thupui hmanga Ruihhlo Do Kawngzawh hi MZP Vice President C.Lalremruata chuan kaihruaiin MZP President H. Lalthianghlima pawhin thu a sawi a, he hunah hian zirlai mi 1600 chuang telin zirlai kalkhawmte hian ruihhlo ti lo turin thutiam an la bawk a ni.