CSR atan MoU ziak fel

Healthy Lunglei District Campaign hnuaia hriselna kawnga hmalakna kalpui mek atan Lunglei District Deputy Commissioner Office in RailTel Corporation of India Limited, New Delhi atanga Corporate Social Responsibility (CSR) kaltlanga tanpuina sum an haichhuah hlawhtlinna tur atana nimin khan inremna thuthlung (Memorandum of Understanding - MoU) an ziak a, he MoU ah hian Lunglei District Bawrhsap R. Lalthazuala leh RailTel Corporation-a Executive Director (CC) Harish Pawaria te chuan an hming an ziak a. Lunglei Bawrhsap chuan Healthy Lunglei District Campaign hnuaia khua leh tuite hriselna dinhmun endikna leh hriselna lam inzirtirna beihpui thlak mek atana RailTel Corporation te'n CSR kaltlanga tanpuina an rawn pe thei tur chu lawmawm a tih thu a sawi a ni.

RailTel Corporation hi sawrkar laipui hnuaia Navratna Central Public Sector Enterprise (CPSE) pakhat niin, khawl hmanga ralkhata inbiakna leh inthlunzawmna (Information & Communication Technology) lama India ram pum khawpui leh thingtlang-ah te inzarpharha hma latu lian tak an ni a. Nimin-a MoU ziahfel tak ang chuan, Healthy Lunglei District Campaign atan hian RailTel Corporation hian CSR kaltlangin Lunglei DC Office-ah cheng nuai 18.92 an rawn pe dawn a, tanpuina sum an rawn pek tur hi tum li a pek tlak tura ruahman niin, tum khatah cheng nuai 4.73 zelin an rawn pe chhuak dawn a ni.