Aizawl khawpui chhung atanga Assam Rifles insawnchhuak tura inremna ziah fel a ni

Chief Minister Lalduhoma chuan Aizawl khawpui chhung atanga Assam Rifles insawnchhuak tura inremna chu Mizoram sawrkar leh Assam Rifles aiawh ten Nilaini kalta, October 23, 2024 khan New Delhi Mizoram House-ah a hriatpuinain an ziak tih a sawi.

New Delhi-a zin Chief Minister Lalduhoma hian Inrinni khan Aizawl rawn thlengin CM’s Conference Hall-ah thuthar lakhawmtute kawmin a zin chhunga hma an lakna hrang hrangte a sawi a, Assam Rifles te Aizawl khawpui chhung atanga Zokhawsang-a an insawnna tur inremna (Memorandum of Agreement for relocation of Assam Rifles to Zokhawsang) chu October 23, 2024 tlai dar 7:00 khan New Delhi-a Mizoram House-ah GAD changtu Commissioner & Secretary to the Govt. of Mizoram Vanlaldina Fanai ICAS leh Lt. General Vikas Lakhera, AVSM, SM, Director General of Assam Rifles te chuan an ziak tih a sawi a. Lalrinawma Khiangte, Under Secretary to the Govt. of Mizoram & PS to Chief Minister leh Col. Navjot Singh, Resident Director, Assam Rifles ten hriatpuitu atan hming an ziak tih a sawi bawk.

Inremna ang chuan Assam Rifles hian tuna HQ 23 Sector, Mizoram Range, Assam Rifles in a luah mek, Khatla ami, Acre 95.88-a zau leh DIG Residence, Acre 0.850 a zau Raj Bhavan Complex sira ram, Commander of Assam Rifles in chenna atana a hman mek te chu an luah chhunzawm dawn a, inremna an ziah atanga chhiara thla thum (3) chhunga an chhuahsan tur ram leh building, Mizoram kuta an hlan tur te chu,Chitte River (Dhobi Nallah), Biak In hmun leh Assam Rifles Church bakah Babutlang ram leh an bungrua te a ni a. Heng bakah hian Lammual leh a chhehvel ram Acre 25.94-a zau te, Main Barrack Complex te, Unit Hospital te leh AR Ground te, Loch House te, Quarter Guard Hill Complex a building te, School huamchhung leh a building bakah War Memorial leh Mandir te chu nakum April 2025 ralhmain Mizoram sawrkarah hlan vek tura tih a ni bawk a, Mizoram sawrkar chuan Assam Rifles te building luah lai, inremna anga hlan tur te hi a man (depreciated cost) chu April 2025 ralhmain Assam Rifles a pe anga, heng Assam Rifles in Mizoram sawrkar hnena a hlan ram leh building te hi Mizoram (Restriction on Use of of Transferred Land) Act, 2022 sawi angin mipuite tana hman tur a nih thu Chief Minister chuan a sawi bawk.

Chief Minister chuan Assam Rifles te Zokhawsang-a sawn chungchang hi Union Home Minister Amit Shah nen  kumin kumtir lamah khan an sawi dun tih sawiin, thil tha zawk a awm theih nan puangzar thui lovin CM Office atanga bawhzui a nih thu leh Secretary to CM, OSD to CM leh CMO-a Officer leh Staff-ten theihtawpin an buaipui tih a sawi a, Assam Rifles te nen hian a hmunah te pawh enfiahin inremna ziah a ni ta tih a sawi a. Memorandum of Agreement ziahna hunah hian sawrkar Official te bakah Delhi-a awm remchang Mizoram MLA te pawh an tel thu a sawi a, heng zingah hian ZPM, MNF leh BJP atanga thlan MLA te an tel thu a sawi a ni.