YMA in Plastic bur/bottle hman tlem inzirtir leh thildang a hman tangkai dan zawn an rel

YMA Inkhawmpui Lian neih loh kum-a neih thin, ‘YMA Rorel Inkhawm’ vawi 4-na chu nimin khan Aizawl Mualpui Salem Veng-a R. Dengthuama Hall-ah neih a ni a, thu pawimawh hrang hrang an rel zingah Plastic bur/bottle-in kan ram a tihchhiat nasat avangin a hman tlem dan inzirtir leh thil danga hman tangkai dan kawng zawn chu a tel a ni.

YMA Rorel Inkhawm hi Central YMA President Lalhmachhuana chuan kaihruaiin Mizoram chhung leh pawn atangin Palai 1215 ten ro an rel a, YMA Khawih Agenda 8 lut te chu pawm vekin heng zingah hian Faina leh thianghlimna kawnga hma kan sawn theih nan bawlhhlawh paih dan inzirtirna neih te; Plastic bur/bottle-in kan ram a tihchhiat nasat avangin a hman tlem dan inzirtir leh thil danga hman tangkai dan kawng zawn te; Kumtin a Furpui a lo thlen dawnin hemi ken tel chhiatna hrang hrang laka lo inven lawkna turin ‘Fimkhurna Hapta/Thla’ ram pumah hman thin te; Mizoram chhunga kawngpui kan neih te a vil kawngah YMA-in hmalak te; Ruihhlo Do kawngah YMA-in tun aia chak zawka hmalak te; Mizottawng humhalh kawnga YMA hmalak mekna chak zawka kalpui te; YMA Inkhawmpui Lian neih loh kumah Sub-Hqrs. YMA Inkhawmpui neih leh Company/Corporate ten Mizoram chhungah CSR tam zawk an hman theih nan Central YMA-in hmalak te a tel a ni.

Sawrkar Khawih Agenda 5 lut zingah pali chu pawm niin ‘Mizoram-a raltlante awmna hmun tur, enkawl dan tur leh kaihhruaina mumal tak Sawrkar-in siamin, khauh takin kengkawh zui rawh se’ tih chu an thurel zingah a tel a. Hei bakah hian Mizoram Lokayukta in thubuai chhuitu tur Investigation Agency hranpa a neih theih nana hmalak te; Tunlai a School thenkhatin Pawl 4 thlenga Mizo subject an la zir mumal lo chungchangah sawrkar in hma a lak leh Mizoram Education (Establishment & Management of Private School) Rules hrang hrang te (Elementary - Higher “Secondary School) a tul anga siamthaa hmalak te a tel a ni.

Nimin-a YMA Rorel Inkhawm-ah hian YMA in ‘Chhiatni/Thatni Kaihhruaina’ a neih kum 2014-a ennawn chu nikum-a YMA Inkhawmpui Lian in ennawn a rel angin ennawna pawm a ni a, kum 2024-2025 chhunga Central YMA Budget Rs. 20,331,980/- chu pharhin pawm a ni bawk. Hei bakah hian Report hrang hrang ngaihthlak niin kum kalta chhunga YMA Member boral mi 1680 te sunna hun hman a ni bawk.