Mizoram-a Kohhran hrang hrangte thawhhona leh inpumkhatna tura hmalatu tur hawn a ni ta

Mizoram-a Kohhran hrang hrangte thawhhona leh inpumkhatna tura hmalatu tur, Council of Churches in Mizoram (CCM) chu nimin khan hawn a ni a, hemi hma niminpiah khan Mission Veng Kohhran Biak In-ah rorel inkhawm neih a ni.

Council of Churches in Mizoram (CCM) hi Mission Veng Kohhran Biak Inpui-ah Mizoram Kohhrante Inpumkhatna Joint Committee Chairman leh Synod Moderator Rev. R.Vanlalnghaka chuan a hawng a, Joint Committee Member Rev. Dr. H. Remthanga chuan CCM hruaitu ruat thar mi 7 te chu a dahnghet bawk a. Inpumkhatna Thuthlung chhiar rualin he hunah hian sawmbik mi thenkhat te an tel bawk a ni.

CCM-ah hian Mizoram chhunga kohhran pariat - Mizoram Presbyterian Kohhran, Mizoram Baptist Kohhran, Evengelical Church of Maraland, Lairam Isua Krista Baptist Kohhran, Evangelical Free Church of India, Isua Krista Kohhran, Independent Church of India leh Wesleyan Methodist Church of Mizoram te an tel mek a. Kohhran member 3,000 nei chin tan tel theih a ni a, tukin dar 7:00 hian CCM office thar chu Synod Conference Centre-ah hawn a ni ang.

CCM a pian theihna atan hian Mizo Theological Association chuan kum 2010 vel atang khan hma an la a, thawhhona atana Joint Meeting hmasa ber chu January 24, 2023 khan Baptist Church of Mizoram (BCM) Headquarters Office, Sêrkawn, Lunglei-ah neih niin Kohhran 5 aiawh an tel a, kalkhâwmte hian Kohhran inpumkhatna kawnga Council din chu tha tiin a ruangâm tûr (structure) duang tûrin Kohhran tin atangin mi pahnih zêl ruatin Member 10 awmin Drafting Committee din a ni a. Hemi hnu hian ruahmanna te thlirin thutkhawm neih chhoh zel a ni a, May 19, 2023-a thutkhawm ah Drafting Committee ruahman chu pawmin mahni Kohhran rorêlna sâng berah ngaihtuah tûra an thlen hnuah heng Kohhran hrang hrangte hian CCM din chu an remti ta a ni.

Hemi hnu April 3, 2024 khân thutkhawm nei lehin CCM hruaitu (adhoc) tûrin President-ah Rev. R. Lalbiakliana (BCM), Vice President Rev. B. Zazawna Lai (LIKBK) leh Rev. Lalrodinpuia LS Nghaling (IKK Bualpui NG), General Secretary-ah Rev. Dr. Lalhmangaiha (Presbyterian), Joint Secretary-ah Rev. T. Salaw (ECM), Treasurer-ah Upa R. Lalmalsawma (Presbyterian) leh Finance Secretary-ah Rev. Jessai L. Neitham (EFCI) te an ruat a ni.

CCM din a nih chhan chu Kohhran tinin thurin leh chin dan an neihte dah thaa mimal, khawtlang leh sawrkar inrelbawlna tihhmasawnna kawnga thukhat vuaa tan ho tum a nih thu CCM hruaitute chuan an sawi a. Interim budget (thla ruk chhung) atan nuai 32 an thawhkhawm a, Inrinni-a rorel inkhawmah hian kumthara an budget tur ruahman lehin Budget hi Kohhran member pakhat zelah Rs. 5 ni turin an rel a ni.