Eptu Party te thutling lo leh belhchian dawl lo hmanga mipui rilru hruaikawi tum ah puh

Home Minister K. Sapdanga chuan eptu Party te chu thutling lo leh belhchian dawl lo hmanga mipui rilru hruaikawi tum-ah a puh.

ZPM party in Aizawl-a Party Chhung Inkhawm nimin a an neih ah Home Minister chuan ZPM in Sawrkarna an chantirh khan Chief Minister-in ni 100 chhunga tihtur a puan nghal avangin mawng pawh hung hman lovin hna an tan chho nghal tih sawiin, “Vawiin thlengin tul takin hna kan thawk mek a ni,” a ti a. “Chuti chung chuan eptu party te atangin sawiselna leh elrelna kan dawng mawlh mawlh a, thutling lo leh belhchian dawl lo hmangin mipui rilru hruaikawi an tum reng a, thudik zawk hmanga heng min beihnate hi sawifiah ve a ngai fo thin a ni,” a ti. Home Minister chuan sawrkarna an chelh tirh atang khan ram kawtchhuah Check Gate-a duty kutkem neite nuaibo hna theihtawpin an thawk nghal tih sawiin, Checkgate zawng zawngah sawrkar palhna lo chuan sum lak leh khawn an phal tawh loh thu te, VIP Culture tibo tura hma lain tunah chuan Airport-ah pawh mipuite nen ang khatin an zin veivak thei ta tih te a sawi a. Sawrkar hnathawk aikal lak tihbo a nih tak thu te, Office hun bi dik taka vawng turin hmalak a nih thu te, Foreign kuhva tawlh ti bo tura hma an lak thu leh Pathian zarah a hlawhtlinna an la hmuh ngei an beisei thu te a sawi bawk a. Sum puk chungchang ah loh theih loha puk ala ngaih thu pawh sawiin, “Amaherawh chu kan pukte hi kan pe leh nghal zel a ni. Hetih lai hian eptu party lam chuan kan pek sawi duh lovin kan puk ringawt an tlangaupui duh zawng a lo ni,” a ti bawk.

Kumin-a Kristiante hunpui Krismas leh kumthar vuakvetah Halpuah leh halmawi khap tlat a nih dawn thu pawh Home Minister chuan sawiin, “ZPM a sawrkar hnuaiah chuan he hunpui hi mipuiten thlamuang taka an hman theih na turin Zan vak Police kan nei tawh dawn a ni,” a ti a, “Kawngpui dungah chauh ni lovin hmun hrang hrangah mipuite thlamuan turin an awm dawn a, YMA-te nen tangho in thahnem ngai takin mipuite tan kan thawk dawn a ni,” a ti. Halpuah leh Halmawi vang hian Lunglam tha lo ten harsatna an tawh phah a, hriselna a thichhia a, damlote tan phurrit a tling tih Home Minister chuan sawiin, “Halpuah leh Halmawi lei nan hian Mzioram sum tam tak a luangral thin a, hei hi tha kan ti lo a ni. Diwali hmangtute pawhin Halpuah leh halmawi hmang tawh lo turin kan ngen mek a, Aizawl khawpui chhunga YMA hruaitute inhmukhawm pawhin Halpuah leh Halmawi hal lo turin Resolution an siam bawk a, chuvangin YMA ten nen tangrualin theihtawp kan chhuah dawn a ni,” tiin Sawrkar hnathawk halpuah leh halmawi phur leh hal an awm a nih chuan sawrkarin natakin hremna a lekkawh dawn tih a sawi bawk.