Ngaihdam dil turin Maxi Cab khalhtu an phut

Vehicle Enforcement Service Association, Mizoram (VESAM) chuan thudik ziktluak lo hmanga Social Media-a thehdarhtu Maxi Cab khalhtu chu ngaihdam dil tura an phut thu an sawi.

Nimin-a thuchhuah an siamah VESAM chuan tunhnaiah Social Media hrang hrangah Maxi Cab khalhtu pakhat chuan Enforcement Duty-ten an lo man chungchang leh pawisa a chawi dan chung-changah thudik tawk lo a thehdarh nia sawiin, “Kan hriat theuh angin Maxi Cab-te hian passenger-te bungrua (personal belongings) bak an phur thiang lo a, sumdawnna bungrua phurhna tur a ni lo a ni,” an ti a. “Kha Maxi Cab pawh kha danin a phal chin bak a phurh avanga man niin, tuna a pawisa chawi (fines) pawh hi receipt mumal taka pek a ni a, sawrkar revenue-ah thehluh vek a ni,” an ti a. Dawt phuah belh hmanga Enforcement Duty-te puh an ni chu Department pumpui hmingchhiatna a nih avangin tha an ti lo hle tih sawiin, “Hetianga thudik ziktluak lo hmanga Social Media-a thehdarhtu, Maxi Cab khalhtu hian a hma thei ang bera ngaihdam dil turin VESAM chuan kan phut a ni,” an ti.

VESAM chuan Transport Department hnuaia Enforcement Staff-te chu Motor Vehicle Act 1988 leh Central Motor Vehicle Rules 1989 kengkawh tura duty thin an nih thu pawh sawiin, “Heng Act leh Rules ang chuan passenger phur chi lirtheite hian sumdawnna bungrua leh lirthei phurh theih china bituk bak phurh phal a ni lo. Chutiang bawkin, bungraw phur chi lirthei (goods carrying vehicles) hmanga passegner phurh phal a ni lo,” an ti bawk.