MNF dincham-ah hun hmang

Nimin October 22, 2024 kha MNF dincham-pha vawi 63-na a ni a, Serchhip East Block MNF chuan he ni pual hian Serchhip-a Mizo Hnam Run ah hun an hmang a ni.
Serchhip East Block MNF President C. Lalrinfela kaihhruaia MNF dinchampha lawmna hunah hian Adviser C. Vanlalsiamthara chuan hunserh a hmang a, he hun hmanpuitu MNF General Hqrs. a General Secretary J. Malsawmzuala Vanchhawng chuan MNF Party chu Pathian hriatpui leh Mizoram leh Hnam bakah kan Sakhua a himna tura din a ni tih sawiin, “Thuthlung nghet tak "Pathian leh kan ram tan" tih neitu kan ni a. He ram leh hnam tan hian Pathianin rorelna a pe leh ngei dawn,” a ti.

Tuna kan sawrkar hrawn mek ZPM Party chu mipui hnena an inzawrhna anga ram hruai leh ngam lo an ni tih pawh J. Malsawmzuala chuan sawiin, “Chhiah tipung ve lo tura intiam siin nasa takin chhiah an tipung a, mirethei ten nasa takin kan tuar mek a. Sawrkarna fung an vawn tirh atangin mahni inhaivur in hamthatna an insiam a, an party hruaitute chu nihna inbel chawpin mipui sum hmangin hlawh tam tak an insiam a, an indinhmun an sawhnghet ta maw tih ah mipui rethei zawkte tawrh theih turin chhiah hrang hrang an tisang a, hei chauh niloin ration buhfai ngei pawh ennawnna felfai tak kalpui hmain a man a letin an tipung a. Heng buhfai te pawh October thla chhung a tlawma la khul tur an tih laiin Zoram pumah a man to in mipui an khultir leh lawi si,” a ti a. “Kalphung thar mumallo tak kan hrawn mek hian mipuite phurrit nasa takin a siam mek a, a pawi hle a. Lalna leh thuneihna duh lutuk avanga an intiam ang tal hian kal ngam se ka duh hle,” a ti bawk.