Mizo Inneih, Inthen leh Rokhawmna Dan ennawntu Committee in thutkhawm an nei

Mizo Inneih, Inthen leh Rokhawmna Dan ennawntu, Review Committee chu nimin khan an Chairman Law & Judicial Department-a Addl. Secretary Zahmingthanga Ralte kaihhruaiin Secretary Conference Hall-ah a tum khatna atan an thukhawm.

The Mizo Marriage, Divorce and Inheritance of Property Act, 2014 hi Law Commission kutchhuak niin Mizoram Assembly chuan kum 2014 khan lungrual taka pass in February 13, 2015 atang khan hman tan a ni. He Dan hman a nih atang hi chuan Mizo Customary Law kan tihfo kha hman a rem tawh lo a. Kum 10 dawn lai hman a nih hnu hian siamthat ngai leh belh leh paih ngai te a lo awm a, Mimal leh pawl engemawzat atanga rawtna lo lut te enfel turin Mizoram Sawrkar chuan he Review Committee hi kumin September 11 khan a din a, an report hi kum khat chhunga thehlut tura tih a ni.

Thutkhawm kaihruaitu Zahmingthanga Ralte chuan Mizoram Kohhran hrang hrang ten inneihna an buatsaihin he Dan hi an an hmang ngei a ni tihlan nan Inneih Certificate-ah an tarlang ngei tur a ni, a ti a. He Dan tlawhchhan lova Inneih te chuan he Dan-in hamthatna hrang hrang a kentel te chu an chang ve thei dawn lo a ni, a ti bawk a. Chuvangin he Dan la hmang ve lo Kohhran an awm chuan hman vat a tul thu a sawi bawk. Hetihrual hian Kohhran hrang hrangin Inneih sawngbawl leh inkaihhruaina an neih te nekbuai lo zawnga he Dan hi siam a ni a, chu chu Sawrkar duhdan reng a ni, a ti bawk.

He thutkhawmah hian Mizoram Kohhran Hruaitu aiawh te, Central YMA, MHIP, MUP leh Women Commission aiawh te bakah mithiam sawm bik engemawzat an tel a ni.