Lok Sabha MP in Mumbai a Mizoram House a buaipui

Mizoram Lok Sabha MP Richard Vanlal-hmangaiha chuan tunkar Thawhtanni atanga Ningani chhung khan Mumbai tlawhin Navi Mumbai-a Mizoram House hmun thar tur chu a tlawh bawk.

Navi Mumbai-a hmun hi Mizoram House sakna tura ruahman tawh sa a ni a, a satu tur thlanfel vek hnuah pawh chhan hrang hrang vangin la sak theih lohin a awm a, sa tura Mizoram sawrkain inremna a lo neihpui tawh US Roofs Ltd. hotute chu Lok Sabha MP hian hmuin harsatna an neih te a sawipui a. Helai ram petu City and Industrial Development Corporation of Maharashtra Limited (CIDCO) Vice Chairman leh Managing Director nihna chelh kawp Vijay Singhal pawh a Office-ah lengin a hmu nghal a, Mizoram sawrkar in harsatna an lo tawh dan te a thlen bawk.

Lok Sabha MP hi Maharashtra Chief Minister chenna In-ah kalin, Mizoram Chief Minister in lehkha ziaka Maharashtra Chief Minister hnena a thawn, he hmun chungchanga Mizoram sawrkarin harsatna a lo tawh thin te chinfelna tura a theih anga tanpui tura a dilna chu a pe nghal a. Mumbai Mizoram House, Parel Veng a awm chu tlawh bawkin, damlo awm mek te a kan bawk a. Hei bakah hian Lok Sabha MP kal chhuak ta C. Lalrosanga, Tata Memorial Hospital ACTREC, Kharghar Mumbai hmuna in enkawl mek pawh a tlawh bawk.