ASF avanga Vawk chan te chhawmdawlna pe dawn

African Swine Fever (ASF) chu kum 2024 chhung atan leh Mizoram State huamchhung atan State Specific Disaster-ah puan a nih tak avangin Disaster Management Act, 2005, Section a8(1)(a) hnuaia siam, State Disaster Response Fund (SDRF) atangin chhawmdawlna pek an ni dawn.

Hemi chungchanga sawrkar thuchhuah tarlan danin State Disaster Response Fund (SDRF) leh India sawrkar hnuaia Ministry of Home Affairs-in kum 2022-23 atanga 2025-26 inkar atana National Disaster Response Fund (NDRF) hmanga chhiatna tawkte chhawmdawl dan tur kalphung a duan chu he chhiatna thleng atan hian kum 2024 chhungin hman a ni dawn a, ASF hri leng avanga chhiatna tawkte chhawmdawl dan tur kaihhruaina kimchang pawh siam niin kum 2024-a sawrkarin ASF hri kai a hriat hmasak ber ni chu Mizoram State chhunga ASF hri len tan hun anga ngaih a ni ang.

SDRF inkaihhruaina hnuaiah hian Vawk chu eizawnna atana ranvulh tenau zinga chhiar tel a nih angin ASF hri avanga Vawk chante chu SDRF huamchhungah hian chhawmdawlna pek theih an ni anga, ASF vanga Vawk thi chhawmdawlna hi mahni awmna District theuhvah Animal Husbandry & Veterinary Department hnuaia District Veterinary Officer hnenah dil tur a ni anga, District Veterinary Officer-in a enfiah hnuah a dik chuan lehkha (certificate) siamin DVO chuan chhawmdawlna dilna chu Deputy Commissioner, District Disaster Management Authority Chairperson ni bawk hnenah ASF vanga Vawk thi tih hriatpuina Certificate nen a thawn anga; DVO-in Certificate a siam tel lo chuan dilna hi pawm theih ni lovang.

He chhawmdawlna hi ASF natna avanga Vawk thi atan chauh pek theih niin hri leng venna tura Vawk suat a huam lo a, Vawk suat avanga Vawk chante chhawmdawlna chu a hranpa in sawrkar laipui tanpuina, Assistance to States for Control of Animal Disease (ASCAD) hnuaiah pek theih a ni thung a, chhawmdawlna dilna chu vawk thih ni atanga ni 30 (sawm thum) emaw, he thuchhuah ni atanga ni 30 (sawm thum) emaw chhungin thehluh hman tur a ni.

ASF hri leng avanga vawk hlohtute chhawmdawlna chu SDRF kalphung angin Vawk pakhat zelah Rs.4,000/- zel pek theih niin kum 2024 chhunga ASF vanga harsatna (State Specific Disaster of ASF for 2024) bik atan erawh hi chuan vawk thi chu engzat pawh ni se chhawmdawlna hi chhungkaw khat tan vawk paruk chin atan chauh pek theih a ni anga, Bank Account kaltlanga pek tur niin Sawrkar scheme dang hnuaia ASF vanga vawk thi tanpuina lo dawng tawhte chuan he chhawmdawlna hi an dawng thei lo anga, sawrkar in a thuchhuah a hnuhdawh hma chuan he thupek hi hman zui tur a ni ang.