Sawrkar in kawng siam dan phung thlak a dil

Chief Minister Lalduhoma’n sawrkar laipui-a Minister of Road Transport & Highways Nitin Gadkari hnenah Mizoram kawng chhia a ziaawm nan kawng siam dan phung thara kal an dil tih a sawi.

Aijal Club-a Mizoram Economic Summit a hawnna nimin-a neih ah Chief Minister chuan kumin ah Mizoram in chhiatna tam tak a tawh avangin rikrum thil ah sum hmanna tura an ruahman sa zawng zawng pawh hman a ngai thin tih a sawi a. Mizoram kawng chungchang sawiin NHIDCL in kawng an laih Fur khat daih lo a awm thu leh tuna kawng siam dan phung kalpui mek chu Bituminous Pavement a nih thu leh hei hian tui a ngam lo hle tih a sawi a. “Fur a rei tual tual a, kawngsiam tura hnathawh theihna hun a tlem a, kum khatah thla 5 emaw lek kawng siamna hun a awm,” tiin hemi thlak nan Mizoram sawrkar emaw, Company dangte pawhin kawng siam hna an thawh tur reng rengah Concrete hmanga kawng siam, Rigid Pavement hman chu sawrkar laipuiah dil a ni tih a sawi a ni.

Chief Minister chuan Rigid Pavement hmanga kawng siam chu a tlo hle tih sawiin, Aizawl a Bawngkawn Veng a siam chhin pawh kum 20 ni tawhin a la tha em em tih a sawi a, Rigid Pavement hmang chuan kumtluan in hna a thawh theih a ni tih sawiin, a tirah a siamna man to zawk mahse a daih rei avangin ram sum leh pai dinhmun ngaihtuah pawhin a tha zawk dawn tih a sawi a. Kawng siam dan System thlak an dilna chu phalsak an nih chuan Mizoram kawng pawh a ziaaawm a beisei thu a sawi bawk.