Buannel leh Phawnpui Park te tlawh theih dawn hnai

Mizote ngaihhlut leh tlawh châk, Buannel leh Phawngpui National Park chu thla thar November thla atang hian tlawh theih a ni chho leh dawn nia thudawn a ni.

Mizote ngaihhlut leh tlawh nasat, Myanmar ram chhunga awm, Buannel hi November thla chho atang hian mipui nawlpui tlawh theih a ni chho leh tawh dawn tih Buannel Board Secretary Lalnuntluanga chuan a sawi a, a tlangpuiin Thal lai, November - June (ruahtui tlak dan a zir) chhung chu Buannel tlawh hunlai a ni tih sawiin, chung hunlai chu Buannel hmunhma bakah a kawng pawh a nawm hunlai a ni tih a sawi a. Buannel chu Mizo mipuiin an ngaihlu hle a an hriat thu sawiin, tlawh theih a nih hunlai chuan chawhrualin ni tin tlawhtu mi 100 vel an awm thin niin a sawi bawk.

Buannel Board Secretary chuan Buannel tlawhtute atangin mi pakhat zelah Rs. 100 an la thin tih pawh sawiin, chu chu Buannel panna kawng cheithatna atan te an hmang thin tih a sawi a, tunah pawh a panna kawng an thuamthat mek thu leh zawhfel thuai an beisei thu a sawi bawk.

Hetihlai hian Chhimtuipui Wildlife Division-a Divisional Forest Officer Dr. Lalruatfela chuan Phawngpui National Park chu May 1, 2024 atanga November 1, 2024 thleng khar niin mipuite tan tlawh theih a ni leh tawh dawn hnai tih a sawi a. Hetianga an khar chhan hi hi Fur lai a nih avang leh nungchate zalen leh him zawka an inthlahpun theihna tur atana ruahman a nih vang a ni tih sawiin, Phawngpui National Park khar a nih chhungin dan bawhchhiaa Phawngpui tlang kal lui man an awm lo tih a sawi bawk.

Chhimtuipui Wildlife Division-a DFO chuan Phawngpui National Park hi hawn a nih laiin tlawhtu an tam thin tih a sawi a, inkaihhruaina an siamte a tlawhtuten tha taka zawmin Park chhunga faina chungchangah pawh mipuiten hma kan sawn niin a sawi bawk.