MLDB Chairman in MLDB din a nih chhan te a sawi

Mizo Language Development Board (MLDB) Chairman R. Lallianzuala chuan Mizo tawng humhim tihhmasawn leh thehdarh kawnga hma la turin Mizoram sawrkarin Mizo Language Development Board a din thu a sawi.

Mizo Academy of Letters (MAL), Joint Headquarters Lunglei leh Department of Mizo, Lunglei Govt. College (LGC) tangkawpin ‘Lalhmingliana Saiawi thu leh hla zirhona’, One day State level Seminar nimin-a Art & Culture Auditorium Lunglei-a an buatsaih a hmanpuina ah he thu hi sawiin MLDB Chairman chuan MLDB din a nih theih nana March ni 10, 2022-a Mizoram State Legislative Assembly thukhawma lungrual taka Mizo Language Development Board (MLDB) Bill, 2022 pawm a ni chu a hluin, a chhinchhiah tlak hle tih a sawi a. MLDB-in hma lakna leh hma-chhawp a neihte tarlangin, MLDB hnuaia Committee peng pathum - Grammar Committee, Glossary (Mizo tawng Zempui) Committee leh Research & Documentation Committee te kaltlangin Mizo tawng hmasawnna turin hmalak chhoh mek a nih thu a sawi a. Mizo tawng hawrawp, thumal leh tawngkauchheh zirchian a, humhalh leh tih-hmasawn kawngah te, Mizo thu leh hlate zirchianna lamah te hmalak chhoh zel tum a nih thu a sawi bawk.

MLDB Chairman chuan ‘Lalhmingliana Saiawi thu leh hla zirhona’ pawh hi MLDB hma-lakna tur huamchhunga tel tho a nih angin sum leh paia do ve an nih thu a sawi a. Lalhmingliana Saiawi kutchhuakte chu amah kum 50 a tlin hnua chhuak deuh chauh a ni hlawm tih tarlangin, Pathian in thluak, hriatna leh thiamna a pekte hmanga thangtharte tana rohlu hnutchhiah tura thu leh hla lam luhchilh tura kum upa zawkte cho chhuaktu nise a duh thu a sawi bawk.

He zirhona hi Lalhmingliana Saiawi (L) nupui, Lalthankhumi (Nupuii) leh MLDB te'n an tum (sponsor) a ni.