Vairengte leh Sairang inkar kawngpui laih turah Zangnadawmna tihfel a nih thu CM in a sawi

Vairengte leh Sairang inkara kawngpui lian laih tura zangna-dawmna tihfel a nih thu Chief Minister Lalduhoma’n a sawi.

Sawrkar laipui dawra New Delhi-a zin Chief Minister Lalduhoma chuan Inrinni-a thuthar thehdarhtute a kawmna ah zangnadawmna tihfel a nih tak thu leh sawrkar laipui an dawr dan te a sawi a. Chief Minister chuan zangnadawmna tihfel theih loh vanga hun rei tak Vairengte leh Sairang inkar kawngpui laih theih loha a awm reng hnuah tunhmaa thil la tih ngai loh, inthlahrung taka rawtna an thlen chu pawmsak an nih thu a sawi a. Vairengte leh Sairang inkar kawngpui laih tur hi Forest Department leh mi engemaw zatin an ram a nih thu an chhal a. Ramneitu a inchhalte hi an dinna a dik ve ve avangin thil la tih ngai loh ni mah se ‘an pahnih hian zangnadawmna pek ve ve ni mai se’ tih an rawt chu lo pawmpuiin pawisa pawh tihfel nghal a ni tih a sawi a. Forest Department chan turin cheng vbc. 90 vel leh ram neitu dangte chan turin cheng vbc. 1,100 vel ruahman nghal a ni, a ti.

Hei bakah hian Chief Minister chuan Ministry of Road Transport & Highway (MoRTH) changtu Minister hnenah Mizorama kawngpui zawng zawngte Alkatra luan lova Cement hmanga kawngpui siam thin ni tawh se tih rawtna an thlen thu leh Forest Clearance hmuh a harsat thin avanga kawngpui a laih zung zung theih thin loh pumpelh nan Dan thar hnuaiah Mizorama kawng te chu Strategic Highway-a puang vek tura an ngen thu te pawh Chief Minister hian a sawi bawk.