Chhui turin Mizoram Lokayukta Chairman an ngen

Kulhpawn Monitoring Committee ti invuah te chuan nimin khan Aizawl Press Club-ah thuthar lakhawmtute kawmin Mizoram Police Headquarters hnuaia Police Quarters 26 sak chungchanga Contractor thlan dan dik lo chhui chiang turin Mizoram Lokayukta Chairman chu an ngen tih an sawi.

Kulhpawn Monitoring Committee hruaitute chuan Mizoram Police Headquarters in hmun hrang hrang 26-a Police Quarters sak chung-hangah induhsakna hmanga Contractor thlan anih thu an sawi a. Tender chhuah dan leh a chhangtu endik dan kalphung chu a dik tawk lo tiin contractor tur thlansa an neihte chu Comparative Statement-ah column bik siama dah hran an nih thu an sawi a. He Tender-ah hian bid capacity enfiahna leh chhutna tarlan engmah awm lovin Contractor-te chu hna pek annih thu an sawi bawk. 

Kulhpawn Monitoring Committee hruaitute chuan hemi chungchang ah hian Police Headquarters-a thuneitu hrang hrangte an inhnamhnawih ni a an hriat thu an sawi bawk a. Dan hrang hrang hmanga chhui chhuah sak turin Mizoram Lokayukta Chairman chu an ngen tih an sawi a ni.