State pawn-ah Eri Cut Cocoon thawnchhuah a ni

Sericulture Department hnuaia Eri Project kalpul mekah Sericulture Farmer te tharchhuah ‘Eri Cut Cocoon’ chu State pawnah thawnchhuah a ni.

Heng Eri Cocoon thawnchhuah hi Sericulture Minister Lalthansanga hovin nimin khan Sericulture Directorate, Chaltlang-ah vailiam a ni a, he hunah hian Minister chuan State pawna thawnchhuah tham Eri Cut Cocoon Mizoram in an nei chu lawmawm atih thu sawiin, Cocoon te chu State pawnah man man zawka hralh theih a nih bakah, mamawhna a sang a, tawih chhe ve mai thei lo anih avangin thawnchhuah kawngah harsatna a awm lo tih sawiin, kuthnathawktuten intihhmuh a, uar deuh a pawimawh tih a sawi.

He hunah hian Sericulture Department Director V. Zothansanga chuan Cocoon khawitute chu Sawrkarin a ngaihtuah em em a, an pangngang khawite chu man man zawka an hralhchhuah theih nan theihtawpin hma a la mek a, Sericulture Department pawhin hlawk zawka Cocoon hralh anih theih nan hma an lak mek thu a sawi bawk. 

Tun tuma Eri Cut Cocoon thawnchhuah hi a hrin laiin Metric Ton 11 a ni a. A chunga buhchium tel lova hralh tur anih avangin buhchium lakchhuah vek a ni a. Cut Cocoon hi Metric Ton 2 niin kumin June thla khan Sericulture Farmer te thar chhuah Eri Cut Cocoon hi Kg 1000 vel Department in a lo thawn chhuah sak tawh a ni.