India rama Buhtun chawikanna pualin hun hmang

Ni hnih awh tur India rama Buhtun chawikanna, Promotion of Millets in India Programme chu nimin khan Aijal Club-ah hman niin he hun hi Agriculture Minister PC. Vanlalruata chuan a hmanpui a ni.

North-Eastern Regional Agriculture Marketing Corporation (NERAMAC) leh Ministry of Agriculture & Farmers Welfare, Govt. of India buatsaiha he hun hman ah hian Agriculture Minister chuan tunhma chuan lo-a buh karah buhtun hi chin thin thu leh hun rei tak hnuah buhtun chin uar tura NERAMAC hmalakna chu lawmawm a tih thu a sawi a. Mizote'n kan hriselna kawngah hma kan sawnpui ngei a rin thu sawiin, a bik takin Zunthlum natna neite'n hlawkna nasa tak an chan theih a beisei thu a sawi bawk.

He hunah hian Agriculture Director Ramdinliani IAS chuan Buhtun chu thlai fei tak, sik leh sa ngam tak, chin awlsam si, chaw tha em em a nih avangin Mizoram-ah pawh kan uar lehzual a ngaih thu a sawi a. Tunhma chuan Mizo pawhin buhtun hi chaw nen chhum kawpin kan ei thin tih sawiin, tunlai thangthar te'n kan ei tam ta loh chu a veiawm thu leh a hlutna tihpun lam uar a, buhtun product ei tam a that thu te a sawi a. Millets lama entrepreneurs hmala duh te tan pawh India sawrkar chu a inhawn hle thu a sawi bawk.

Nimin-a he hun hman in a tum ber chu Buhtun (Millets) chu chaw hrisel leh tha anih avanga mipuite'n kan ei tam a pawimawh thu inzirtir a, inhrilhhriatna niin Programme a tel kuthnathawktute nen sawihona hun tha tak hman ho a ni bawk a. India ramah kum 2018 khan Year of millet puan a ni a. Khawvel pumah kum 2023-ah Year of millet puan leh a ni bawk a. Commodore Rajiv Ashok (Retd), MD, NERAMAC chuan Buhtun hmanga sumdawng leh ei tur siam te stall hawnga an lo tel thei chu lawmawm a tih thu sawiin, Buhtun-ah hian ei tur tha protein, fibre leh Glycemic index a hniam avangin diabetics patients te tan a tha em em a. Buhtun chin hi a awlsamin tui a mamawh tlem tlem a ni, a ti.

Nimin-a he hun hman zawh hian Buhtun atanga ei tur siamchhuah chi hrang hrang phochhuahna Stall 12 te chu Minister hian hawng zui nghal a, mipui a duh apiangte tana en leh lei theiha chhawpchhuah nghal niin Vawiin, a ni hnihna-ah hian mipuite tan chawhnu dar 2:00 thleng Stall hawn chhunzawm tur a nih dawn bakah B2B (Business to Business) session neih tur a ni ang.

India sawrkar rawtna angin kum 2023 khan United Nations, Food and Agricultural Organization chuan International Year of Millets-ah a puang tawh a. A tum ber chu zau zawk leh uar zawka millet thatna puanzar leh uar zawka chin a ni. Millets hi chi hrang hrang 12 a awm a. Chung zingah chuan Mizoin kan hriat lar chu Faisa, Puakzo leh Buhtun a ni.