Bana kaih dilna sawiho

Mizoram State Policy Coordination Committee (MSPCC) chu nimin khan Adviser to Chief Minister for Implementation of Handholding Scheme Dr. KC Lalmalsawmzauva kaihhruaia thukhawmin Ban-a Kaih Scheme kal mekah Department thenkhat hnuaia dilna lut te an thlirho a, lirthei lei chungchanga dilna lut, Taxi (2-wheeler, 4-wheeler leh Auto Rickshaw) atana dilna chu Handholding Scheme hian a huam telloh thu sawi a ni a. Commercial Passenger Vehicle dangah chuan hnuaiah a diltu ngei hminga State Transport Authority (STA) permit/licence nei tawh tan Scheme hian a huam thei dawn a ni.

Hei bakah hian CM Special Package dilna chu Chief Minister's Office ah dilna thehluh tura ruahman ni mah se mipui remchan zawkna atan mahni District-a Deputy Commissioner-te hnenah pawh dilna thehluh thei tawh tura rel a ni a. Ban-a kaih (Handholding) Scheme inkaih-hruaina bu Mizo tawng-a lehlin chu thlirho niin pawm a ni a. Scheme publicity chungchang sawiho ni bawkin ruahmanna chhawpchhuah te sawiho a pawm a ni bawk.