Tun thla chhunga kawng thawmtha turin hriattir

Kolasib District Drivers & Owners Joint Action Committee hruaitute chuan Sethawn leh Kawnpui Quary Area-a kawngpui chhe zual tun thla chhunga thawmthat anih loh chuan na taka hmalak an tum tih an sawi.

Kolasib a lirthei neitu leh a khalhtu pawl te hi niminpiah khan Kolasib-a NHIDCL Office-ah kal in, inremna an lo siam tawh anga helai kawng siamthat a ni lo chu an lungawi lo hle tih an sawi a, tun thla ralhmaa NHIDCL ten an intiamna anga Sethawn leh Kawnpui Quarry area a kawngpui thawmthat hna te hi an thawk zo lo a nih chuan na taka hmalak an tum thu ziakin an hrilh a. Tun thla ni 22 thleng pawh a Sethawn leh Kawnpui quarry area ah kawngpui chhia thawm-that muang lutuk leh Trafic jam a la awm fo chu an hriatthiam loh thu sawiin, lirthei vei vak leh passenger mai bakah zirlaite thlenga harsatna an tawh nasat mai bakah kawngpui chhiat vanga lirthei chhiat phah leh accident thleng mek te chu en liam mai an tum lo tih an sawi.

NHIDCL Project Manager chuan, Vairengte leh Bilkhawthlir inkar leh Kolasib leh Kawnpui inkar te chu tun thla ni 28 atangin Balajee ten hna an thawh dawn thu leh uluk zawka vilpui turin JAC hruaitute hi a lo sawm nghal bawk a. Balajee Project Manager te pawh he hunah hian koh tel nghal niin, JAC hruaitute hian kawng an siam that pawh vilzui zel an tum thu leh an beisei anga hmalakna a awm loh chuan khauh taka an kal tur thu an hrilh niin a sawi a ni.