A thlawna thisen pek tam ber tum thleng chho

Sawrkar kum kal mek-a kum chanve (April - September, 2024) chhungin Mizoram-ah a thlawnin Thisen Unit 17,559 pek ni tawhin hei hi thisen pek zawng zawng atanga chhutin za zela 94.19 a ni a, Mizoram-ah kum chanve chhunga a thlawna thisen pek tam ber tum a ni.

Nimin khan Association for Voluntary Blood Donation (AVBD) chu an Patron leh Health Minister Lalrinpuii hovin a Pisa-ah an thukhawm a, he hunah hian sawrkar kum kal mek 2024-25 kum chanve (April - September) chunga a thlawna thisen pek dinhmun thlirletin tun thla 6 chhung hian Mizoram-a Blood Centre 11-ah thisen Unit 18,643 pek ni tawhin heta tang hian Unit 17,559 chu a thlawna pek a ni a, hei hi thisen pek zawng zawng atanga chhutin 94.19% a ni a. Tun kum chanve chhunga a thlawn thisen pek hi Mizoram in a thlen san ber tum niin AVBD chuan thisen petu zawng zawng chungah lawmthu a sawi a ni.

He thutkhawm ah hian Health Minister Lalrinpuii chuan tlawmngaia thisen petute chungah lawmthu sawiin, AVBD hmalakna chu chhuanawm a tih thu a sawi a. India ram State zingah Mizoram hian a chhe zawnga 1-na nihna kan hauh nual thin tih sawiin, Midangte nun chhanna thisen pek kawngah India ram puma ti tha ber nih a beisei thu leh chu dinhmun chu nih tum turin AVBD member te a fuih bawk a ni.

He hunah hian a thlawna thisen pek kawnga hmasawnna tur hrang hrang ruahmanna siam a ni a. December thla chhung hian Krismas pual thisen pek runpui buatsaih tum a ni bawk.