MNF in scholarship sem chhunzawm thuai an phut

MNF Party chuan zirlai tam takin an mamawh leh an innghahna Scholarship sem chhunzawm lova a khaihlak ta chu pawi an tih thu an sawi.

Nimin-a thuchhuah an siamah MNF Party chuan a changtu Minister ber che chhuak lova, zirlai pawl chetchhuah ngaia a awm chu thil zahthlak tak a ni tih sawiin, Zirlai pawlte hmalakna anga sum pawh Central atanga release a nih tawh laia a dawngtu tur zirlai, mamawh ngawih ngawihtute hnena sem chhunzawm a la ni lo chu sawrkar inthlahdah vang liau liau niin an sawi a. A rang thei ang bera zirlaite hnena Central atanga an sum dawn tawh chu pechhuak thuai turin Mizoram Sawrkar an phut tih an sawi a ni. MNF Party chuan State sawrkarin a tum ve tur a tihfel har avanga zirlaite tawrhna chu chingfel thuai tura an phut thu pawh sawiin, “Mipui hnena inthlahrung hauh lova chhiah sang tak tak an lak belh laia mamawhte hnena pekchhuah tur an pechhuak hreh tlat hi Mizoram sawrkarin mipui leh zirlaite a ngaihthah zia tichiangtuah kan ngai,” an ti bawk.