Mipuite'n eitur thianghlim leh hrisel an neih theih nana hmalak dan tur Minister hovin sawiho

Health Minister Lalrinpuii hovin nimin khan a Pisa-ah mipuite'n eitur thianghlim leh hrisel an neih theih nana hmalak dan tur sawiho a ni.

Health Minister hian a Pisa-ah Health & Family Welfare Department hnuaia Food Safety lam hotute kovin mipuite a tana eitur hrisel leh thianghlim chhawpchhuah kawnga hmalak dan tur hrang hrangte a sawipui a. Mizoram mipui tlemte zingah natna hrang hrang- Nerve thalo atanga Cancer thlenga vei kan tamin, natna thlentu zingah hian ei leh in hrisel lo leh thianghlim lo chu a chhan bulpui pakhat a nih tel avangin Food Safety lamah nasa zawkin hmalak tum a ni a. Health Minister chuan Mizoramin Food Testing Laboratory changtlung kan neih theih nan a hmun tur GAD-ah dilna a thlen tawh thu sawiin, a sakna tur sum pawh Sawrkar laipui lamah ngaihtuaha Testing Laboratory tha leh changtlung neih theih nana theihtawp chhuah tlan a tul thu a sawi a. Thawktu lam indaihlohna pawh hemi kaihhnawih Sawrkar hotute sawipui thuai a tum thu sawiin, Mobile Food Testing VAN neih mek leh Testing Laboratory-a khawl neih ang angte pawh mipuite'n tangkai leh tha zawka an hman theih nana hma la turin a chah a ni.

He hunah hian Food Safety hotute chuan report pein, thawktu indaihlohna avang leh Testing Laboratory changtlung neih loh avangin nasa zawka hmalak a harsat thu Minister hnenah hian an thlen a. Tunhnaia FSSAI Ranking-a Mizoram dinhmun hniam lutuk chhan pawh thawktu neih tlem avang leh chhan dang dang avangte a nih thu an sawi bawk.