MCVU hmalakna lirthei neitu thenkhat in thlawp lo; Service duh tan sawrkar in hmalak a tum
MCVU ten lungawilohna lantir an tum chungchang ah hian Serchhip-a Taxi neitute chuan Serchhip Taxi Owners’ Association chu Mizoram Taxi Association (MTA) hnuaia Sub-Hqrs. a nih thu sawiin, lungawi lohna lantir an tum hmasak khan MTA chuan MCVU Member an nih loh avanga tel an tum loh thu an lo sawi tawh avangin tun tumah hian thu thar awm lovin lungawi lohna lantir zingah hian tel lo tura an in ngaih thu leh an tlan dawn thu an sawi a. Serchhip Auto Rickshaw Owners’ Association (SAROA) a tel te pawhin lungawi lohna lantir hi an thlawp leh thlawp loh thu engmah sawi an neih loh thu an sawi a, dan pangngaia an service tur thu erawh an sawi thung a ni.
Serchhip District Truck Owners’ Association te chuan MCVU ten tiamchin awm lova nawrh an tum chu an thlawp loh thu an sawi a, Serchhip Two Wheeler Taxi Association chuan hemi chungchang hi an ngaihtuah dawn thu leh thutlukna erawh an la siam loh thu an sawi a ni.
Hetihlai hian Maxi Cab neitute chuan MCVU te hmalakna hi Mizoram Maxi Cab Owners’ Association in a thlawp avangin Association angin thuchhuah nei lo mah se tlan tum an awm lo niin an sawi thung a ni.
Mizoram sawrkar-a Home Department chuan nimin khan thuchhuah siamin Mizoram Commercial Vehicle Union (MCVU) in lungawi lohna lantira nawrh huaihawt an tum chu Mizoram sawrkar chuan nuar lo tura a duh thu leh mipui tana harsatna thlentir lo turin a ngen thu an tarlang a, Commercial vehicle pawl thenkhatin mipui tana harsatna thleng palh thei hriaa nawrh ve loh an rel chu sawrkar chuan lawmawm a tih thu sawiin, “Hei vang hian tluang taka an service ngei theihna turin sawrkar chuan hma a la dawn a; Commercial Vehicle zinga service duhte an duh anga an service ngei theihna turin sawrkarin hma lâk a tum,” an ti.
Sawrkar thuchhuah chuan Chhiah tihsan chungchanga mipui nawlpuiin nghet taka ding tura sawrkar an ngenna ah sawrkar in lawmthu a sawi thu leh heng chhiah (cess) tlingkhawmte hi mipui hnenah a kir leh vek dawn a, ram hmasawnna tura kawng hrang hranga hman tura duan lawk a ni tih an tarlang a. “Heti chunga MCVU-in nawrh an kalpui tlang dawn a nih pawhin mipuiin an tawrh lohna turin sawrkarin theihtawp a chhuah dawn a, ruahmanna pawh a siam lawk tawh a; mipui tana harsatna thleng zawnga hma la lo turin Mizoram sawrkar chuan pawl hrang hrangte a ngen a ni,” an ti bawk.
Comments
Post a Comment